चौधरीलाई आममाफी दिनु संवैधानिक सर्वोच्चताको विपरीत : नेपाल बार

काठमाडौं । नेपाल बार एसोसिएसनले टीकापुर घटनामा दोषी ठहर भएका रेशम चौधरीलाई आममाफी दिनु संवैधानिक सर्वोच्चता र विधिको शासन विपरीत भएको प्रतिक्रिया दिएको छ ।

आइतबार मन्त्रपिरिषदको सिफरिसमा राष्ट्रपतिबाट आममाफी पाएका चौधरी आज सोमबार कारागारमुक्त भएका हुन् ।टीकापुर घटनासँग सम्बन्धित सर्वोच्च अदालतबाट भएको फैसलाको पूर्ण पाठ पनि नआउँदै सरकारले आममाफी दिनुले दण्डहीनतालाई प्रशय दिने नेपाल बारले जनाएको छ ।

‘विभिन्न अदालतबाट भएको सजायलाई माफी दिन सिफारिस हुँदा २०७२ सालको टीकापुर कैलाली घटनासँग सम्बन्धित व्यक्तिहरूलाई समेत सम्मानित सर्वोच्च अदालतबाट भएको फैसलाको पूर्ण पाठ नआउँदै नेपाल सरकारको सिफारिस बमोजिम सम्माननीय राष्ट्रपतिज्यूबाट माफी दिइनु संवैधानिक सर्वोच्चता, विधिको शासन एवं आममाफी सम्बन्धी अवधारणा विपरीत भई यस्तो कार्यले अन्ततः दण्डहीनताले प्रशय पाउँदछ । तसर्थ, नेपाल बार एसोसिएसन नेपाल सरकार, राज्यका मुख्य अङ्ग र सोका प्रमुखलाई अदालतबाट भएका सजाय माफी र पीडितको न्यायका विषयमा गम्भीर हुन ध्यानाकर्षण गराउँदछ ।’ नेपाल बार एसोसिएसनले जारी गरेको विज्ञप्तिमा भनिएको छ ।