काठमाडौँ । जनमत पार्टीले प्रतिनिधिसभाका दुई जना समानुपातिक सांसदलाई हटाउन प्रक्रिया अघि बढाउने निर्णय गरेको छ । शुक्रबार बसेको जनमतको केन्द्रीय समिति बैठकले संसदमा प्रभावकारी भूमिका खेल्न नसकेको निष्कर्ष निकाल्दै सोनु मुर्मुर र बिनिता सिंहलाई सांसदबाट हटाउने प्रक्रिया थाल्ने निर्णय गरेको हो ।
नेता चन्दक सिंहका अनुसार सांसदका रुपमा उनीहरुमा अक्षमता देखिएको निष्कर्ष बैठकले निकालेको छ । जनमतले सबै प्रक्रिया मिलाएर उनीहरुको ठाउँमा नयाँ नाम पठाउने निर्णय पनि गरेको छ।
यद्यपि बैठकले नयाँ नाम भने टुंगो लगाइसकेको छैन ।
जनमत पार्टीको प्रतिनिधिसभामा ६ सांसद रहेका छन् । जसमा सीके राउतमात्रै प्रत्यक्षबाट निर्वाचित भएका थिए ।
