प्रतिनिधि सभामा आज पनि ढिलासुस्ती : किन समयमा शुरु भएन बैठक ?

काठमाडौं । प्रतिनिधि सभा बैठक बिहान ११ बजेका लागि बोलाइए पनि अझै शुरु हुन सकेको छैन ।

आजको बैठकमा नीति तथा कार्यक्रममाथि सांसदहरुले उठाएका प्रश्नमा प्रधानमन्त्रीले जवाफ दिँदैछन् ।

पूर्व निर्धारित समय र कार्यसूची हुँदा पनि यसअघि जस्तै प्रतिनिधि सभा बैठक शुरु हुन सकेको छैन ।

संसदको प्रमुख प्रतिपक्षी दल नेकपा एमालेले नीति तथा कार्यक्रमले समग्र विषय समेट्न नसकेको भन्दै आपत्ति जनाएपछि अहिले छलफल जारी रहेको छ । सभामुखको कार्यकक्षमा अहिले एमालेका प्रमुख सचेतक, सचेतकसँग सभामुखको छलफल जारी रहेको एक सांसदले लोकपथलाई जानकारी दिए ।

‘नीति तथा कार्यक्रममाथि एमालेले प्रश्न उठाएपछि अहिले छलफल जारी रहेको छ । जसको कारण प्रतिनिधि सभा बैठक समेत बस्न नसकेको हो ।’ ती सांसदले लोकपथसँग भने ।

यसअघि पनि पूर्व निर्धातिर समय र कार्यसूची हुँदा पनि बैठक समयमा शुरु हुन नसकेको भन्दै आलोचना हुने गरेको थियो ।