राहत सामग्रीसहित आगलागी पीडित कहाँ पुगे प्रदेश सांसद तामाङ

काठमाडौं । बागमती प्रदेश सभा सांसद कृष्णकुमार तामाङ ‘समीर’ले आगलागी पीडितलाई राहत सामग्री प्रदान गरेका छन् । गत वैशाख २७ गते राती आगलागीबाट पीडित मेलम्ची नगरपालिका–६ तालामाराङकी कमला केसीको परिवारलाई तामाङले शनिबार राहत सामग्री प्रदान गरेका हुन् ।

आगलागीबाट केसीको घर जलेर पूर्ण रुपमा नष्ट भएको थियो । उनको परिवारलाई जीवनयापनका लागि अत्यावश्यक खाद्यान्न, भाडाकुँडा, लत्ताकपडा लगायतका सामग्री हस्तान्तरण गरेका हुन् ।

विभिन्न विपत्तिमा जनताको साथमा रहँदै आएका तामाङले सामान हस्तान्तरण गर्दै आगामी दिनमा आवश्यक पर्ने सहयोग गर्ने प्रतिवद्धतासमेत व्यक्त गरे ।

राहत सामग्री हस्तान्तरण कार्यक्रममा नेपाली कांग्रेस सिन्धुपाल्चोक जिल्ला सचिव रमेशराज भण्डारी, मेनपा ६ का वडाध्यक्ष प्रेमबहादुर तामाङ, नेपाली कांग्रेस मेलम्ची नगर उपसभापति रामशरण गिरी लगायतको उपस्थिति रहेको थियो ।