विपक्षी दलको नेतासम्बन्धी रिट सर्वोच्चद्वारा खारेज

काठमाडौं । सर्वोच्च अदालतले विपक्षी दलको नेतासम्बन्धी रिट खारेज गरेको छ ।

पूर्वप्रधानमन्त्री एवं नेपाली कांग्रेस संसदीय दलका नेता शेरबहादुर देउवालाई विपक्षी दलको नेता मान्यता दिन नहुने मागदाबीसहित सर्वोच्चमा पुगेको रिट खारेज भएको हो ।

सर्वोच्चका न्यायाधीशद्वय डा। आनन्दमोहन भट्टराई र डा। मनोजकुमार शर्माको संयुक्त इजलासले खारेज गरेको हो ।

अधिवक्ता विमलप्रसाद पोखरेलले देउवालाई विपक्षी दलको नेता कायम गर्न नहुने मागदाबी गरेका थिए ।

सरकारलाई विश्वासको मत दिने दल विपक्षी हुन नसक्ने पोखरेलको दाबी रहेको थियो ।

देउवाले वर्तमान सरकारलाई विश्वासको मत दिएर विपक्षी दलको नेताको मान्यता दिन भन्दै संसद सचिवालयलाई पत्र लेखेका थिए । त्यससँगै देउवाको चौतर्फी आलोचना समेत भएको थियो ।

यता सरकारलाई विश्वासको मत नदिएका संसदका केही साना दलहरुले भने आफूहरुलाई विपक्षी दलको मान्यता दिन आग्रह गरेका थिए ।