काठमाडौं । शुक्रबार भौतिक पूर्वाधारबाट उपप्रधानसहित गृहमन्त्री बनेका नारायणकाजी श्रेष्ठले पदभार ग्रहण गरेका छन् ।
राष्ट्रपति कार्यालयमा शपथग्रहणपछि मन्त्रालय पुगेर पदभार ग्रहण गरेर आफ्नो लामो रामकहानी सुनाएका छन् ।
सो क्रममा उनले आफ्नो काम गर्ने तौरतरिका सुनाए भने धेरै जसो आफ्नो व्यक्तिगत आनीबानीका बारेमा समेत मन खोलेका थिए ।
सो क्रममा उनले आफू खाने नखाने चिजका बारेमा समेत जानकारी गराए । उनले आफूले ५ क्याटेगोरीका कुराहरु नखाने बताए ।
उपप्रधानमन्त्री श्रेष्ठले भनेका थिए, ‘म पाँचवटा क्याटागोरीको चिज खान्न । माछामासु, चियाकफी खान्न । कोल्ड ड्रिङ्स पिउँदिन । रक्सी पिउँदिन । चुरोट तमाखु, पान, सुपारी पनि खान्न । ग्रिन टी कहिलेकाहीँ खान्छु । र, म घुस पनि खान्न ।’
साथै आफूले महंगो कुनै गिफ्ट समेत अस्वीकार गर्ने गरेको बताए । विदेशी एक निर्माण व्यवसायीेले दिएको उपहार फिर्ता गरेको प्रशंगमा उनले भने, ‘अस्ति एकजना विदेशी निर्माण व्यवसायी मेरो कार्यकक्षमा आउनुभयो । निर्माण व्यवसायीलाई भेट्ने सन्दर्भमा मेरा आफ्नै मान्यता थिए । म उनीहरुसँग बाहिर कतै पनि भेट्दिन थिएँ । र, कार्यकक्षमा पनि एक्लै भेट्दिन थिएँ । ती विदेशी निर्माण व्यवसायीले सानो उपहारको पोको पनि ल्याएका रहेछन् । उनले मतिर तेस्र्याए । मैले भने स्टप । आइ विल सी फस्र्ट । आइ डन्ट एक्सेप्ट कस्टली गिफ्ट भनेँ । खोलेर हेर्दा बिचराले एउटा सानो कप ल्याएको रहेछ । ओके आइ विल टेक दिस भनेर लिएँ । मायाले दिएको सानोतिनो चिज त किन फिर्ता गर्नु र होइन ? तर, म महंगो गिफ्ट चाहीँ लिन्न ।’
त्यस्तै गृहमन्त्री श्रेष्ठले आफूले पाएको जिम्मेवारी कुशलतापूर्वक निर्वाह गर्ने प्रतिबद्धता व्यक्त गरेका छन् ।
यो खबर पढेर तपाईलाई कस्तो महसुस भयो ?
प्रतिक्रिया