काठमाडौं । मिटरब्याज पीडितलाई काठमाडौं महानगरपालिकाले खुलामञ्च प्रवेश गर्न रोक लगाएसँगै पीडितहरु आक्रोशित बनेका छन् । विशेषगरी मधेशका विभिन्न जिल्लाबाट पैदल हिँडेर काठमाडौं आइपुगेका मिटर ब्याज पीडित खुलामञ्च प्रवेश गर्न खोज्दा नगर प्रहरीले रोकेपछि उनीहरु आक्रोशित बनेका हुन् ।
खुलामञ्चमा विरोध कार्यक्रम गर्नका लागि महानगरका प्रमुख र जिल्ला प्रशासन कार्यालयसँग अनुमति मागे पनि नदिएको भन्दै उनीहरुले मेयर बालेन शाहविरुद्ध नाराबाजीसमेत गरे ।
महानगरका मेयर बालेन शाहले मिटर ब्याज पीडितलाई पशुपति धर्मशालामा बस्न आग्रह गर्दा उनीहरुले नमानेको बताए । ‘काठमाडौ बसुन्जेल पशुपति धर्मशालामा बास र खाना को ब्यवस्थापन गर्न हामी तत्पर भएर आज बिहानै उहाँहरुसँग सम्पर्क गरेर हामीले पशुपति जान अग्रह ग¥यौं’ उनले फेसबुकमा लेखेका छन्, ‘तर उहाँहरु खुल्लामन्च मै बस्न खोज्नु भयो । हामीले सम्झाएर रत्नपार्कको शान्तिबाटिकामा आन्दोलन गर्न प्रबन्ध गरेको छौँ ।’
तर, मिटरब्याज पीडितहरुले खुलामञ्चमा नै बस्ने भन्दै खुलामञ्चको गेटबाहिर साँझसम्म पनि प्रदर्शन जारी राखेका छन् ।
तस्बिरहरू : दिनेश रजक/लाेकपथ
यो खबर पढेर तपाईलाई कस्तो महसुस भयो ?
प्रतिक्रिया