भोजपुरी अभिनेत्री आकांक्षा दुबे होटलमा झुण्डिएको अवस्थामा फेला

काठमाडौं । भोजपुरी अभिनेत्री तथा मोडल आकांक्षा दुबे मृत अवस्थामा फेला परेकी छिन् । दुबेको शव सारनाथ थाना क्षेत्रको सोमेन्द्र होटलमा झुण्डिएको अवस्थामा फेला परेको हो ।

घटनाको जानकारी पाएलगत्तै प्रहरीले घटनास्थलमा पुगेर अनुसन्धान शुरु गरेको छ । आकांक्षा २५ वर्षकी थिइन् र छोटो समयमै उनले भोजपुरी उद्योगमा आफ्नो पहिचान बनाएकी थिइन् ।

उनलाई सम्मानित कलाकारमा गनिन्थ्यो । आकांक्षाले भोजपुरी सिनेमा, संगीत र चलचित्रमा पनि काम गरिसकेकी छिन् । उत्तर प्रदेश बाहेक भारतभर उनको राम्रो फ्यान फलोइङ छ ।

टिक–टकबाट गरेकी थिइन् करियर शुरु

आकांक्षा दुबेले आफ्नो करियर सोसल प्लेटफर्म टिक–टकबाट शुरु गरेकी थिइन् । टिक–टकमा आकांक्षाको प्रतिभालाई मानिसहरूले मन पराए र उनको फ्यान फलोइङ बढ्न थाल्यो र पछि, आकांक्षा भोजपुरी फिल्म उद्योगमा प्रवेश गरिन् र भोजपुरी गीत र फिल्महरूमा काम गरिन्। टिकटक बाहेक जनताले उनको फिल्म पनि निकै रुचाएका थिए ।