प्रेमिकालाई कुटपिट गरेपछि मार्वल स्टार जोनाथन पक्राउ

काठमाडौं । मार्वल फिल्मका स्टार अभिनेता जोनाथन मेजर्स विवादमा तानिएका छन् । उनलाई प्रहरीले पक्राउ गरेको छ । उनकी प्रेमिकाको घाँटी थिचेर कुटपिट गरेको आरोपमा शनिबार म्यानहट्टनबाट उनलाई पक्राउ गरिएको हो।

उनकी प्रेमिकाले प्रहरीमा उजुरी दिएपछि उनलाई प्रहरीले पक्राउ गरेको हो । उनको प्रेमिकाका अनुसार जोनाथनले अर्को केटीलाई म्यासेज पठाएका थिए । यसपछि उनकी प्रेमिकाले उनको फोन चेक गर्ने निर्णय गरिन् । यस कारणले जोनाथन रिसाए र त्यसपछि उनीहरूबीच झगडा भयो ।

विवाद पछि कुटपिट

पीडितले प्रहरीमा उजुरी गरेकी छिन् कि ब्रुकलिनको बारबाट सँगै घर फर्किंदै गर्दा ट्याक्सीमा जोनाथनसँग उनको झगडा भएको थियो। जोनाथनले उनलाई कुटपिट गरे । महिलाको टाउको, घाँटी र कानको पछाडि चोट लागेको छ भने अनुहारमा पनि धेरै निशान छन् । त्यसपछि प्रहरीले पीडितलाई अस्पतालमा भर्ना गरेको थियो ।