काठमाडौं । बैंक तथा फाईनान्स कम्पनीहरुमा पछिल्लो समय कर्मचारी खर्च बढेको छ ।
नेपाल राष्ट्र बैंकका अनुसार चालु आर्थिक बर्षको पछिल्लो सात महिनाको अवधिमा सञ्चालनमा रहेका २२ वटा बाँणिज्य बैंक, क्षेत्रिय तथा राष्ट्रियस्तरका समेत गरी १७ वटा बिकास बैंक र १७ वटा फाईनान्स कम्पनी सहितका ५६ वटा संस्थाहरुले कर्मचारीहरुको तलब भत्तामा मात्र कुल ३१ अर्ब ७७ करोड ५० लाख रुपैंयाँ खर्च गरेका छन् ।
बैंकिङ क्षेत्रले कर्मचारीहरुको पारिश्रमिक वितरणमा गरेको यो खर्च गत आवको सोही अवधिको तुलनामा एक अर्ब ५७ करोड ३० लाख रुपैंयाँले बढी हो ।
राष्ट्र बैंकका अनुसार गत आवको सोही अवधिमा भने सञ्चालनमा रहेका २७ वटा बाँणिज्य बैंक, क्षेत्रिय तथा राष्ट्रियस्तरका समेत गरी १७ वटा बिकास बैंक र १७ वटा फाईनान्स कम्पनी सहितका कुल ६१ वटा बैंक तथा फाईनान्स कम्पनीह्रुले कर्मचारीहरुको तलब भत्तामा मात्र कुल ३० अर्ब २० करोड २० लाख रुपैंयाँ खर्च गरेका थिए ।
बैंकिङ क्षेत्रको कुल कर्मचारी खर्च मध्ये बाँणिज्य बैंकहरुले मात्र कर्मचारीहरुको तलब भत्तामा चालु आवको पछिल्लो सात महिनाको अवधिमा कुल २७ अर्ब ७४ करोड ७० लाख रुपैंयाँ खर्च गरेका छन् ।
बाँणिज्य बैंकहरुले गरेको यो खर्च गत आवको सोही अवधिको तुलनामा एक अर्ब चार करोड रुपैंयाँले बढी हो । गत आवको सोही अवधिमा भने बाँणिज्य बैंकहरुको यस्तो खर्च रकम २६ अर्ब ७० करोड ७० लाख रुपैंयाँ रहेको थियो ।
बिकास बैकहरुले पनि चालु आवको पछिल्लो अवधिमा कर्मचारी खर्च बढाएका छन् । नेपाल राष्ट्र बैंकका अनुसार चालु आवको पछिल्लो अवधिमा बिकास बैंकहरुले कर्मचारीहरुको पारिश्रमिकको लागि मात्र कुल तीन अर्ब २६ करोड २० लाख रुपैंयाँ खर्च गरेका छन् ।
यो खर्च गत आवको सोही अवधिको तुलनामा ४६ करोड ५० लाख रुपैंयाँले बढी हो । गत आवको सोही अवधिमा बिकास बैंकहरुको यस्तो खर्च रकम दुई अर्ब ७९ करोड ७० लाख रुपैंयाँ रहेको थियो । फाईनान्स कम्पनीहरुले पनि पछिल्लो अवधिमा कर्मचारी खर्च बढाएका छन् ।
राष्ट्र बैंकका अनुसार चालु आवको पछिल्लो अवधिमा फाईनान्स कम्पनीहरुले कर्मचारीहरुको पारिश्रमिकको लागि मात्र कुल ७६ करोड ६० लाख रुपैंयाँ खर्च गरेका छन् । फाईनान्स कम्पनीहरुले गरेको यो खर्च गत आवको सोही अवधिको तुलनामा छ करोड ८० लाख रुपैंयाँले बढी हो । गत आवको सोही अवधिमा भने फाईनान्स कम्पनीहरुको यस्तो खर्च रकम ६९ करोड ८० लाख रुपैंयाँ रहेको थियो ।
बैक तथा फाईनान्स कम्पनीहरुले कर्मचारीहरुको लागि गरेको खर्च :
विवरण २०७९ माघ मसान्त २०७८ माघ मसान्त फरक
बाँणिज्य बैंक २७७४७ २६७०७ १०४०
बिकास बैंक ३२६२ २७९७ ४६५
फाईनान्स ७६६ ६९८ ६८
