काठमाडौं । नेकपा एकीकृत समाजवादीको स्थायी कमिटीको बैठक शुरु भएको छ ।
पार्टीको केन्द्रीय कार्यालय आलोकनगरमा पार्टीको ५४औं स्थायी कमिटीको बैठक शुरु भएको हो ।
बैठकले पुष्पकमल दाहाल प्रचण्डको सरकारले विश्वासको मत पाए सँगै बैठकले पार्टी सरकारमा सहभागिताका विषय सहित समसामयिक विषयवस्तुमा छलफल हुने पार्टीका उपमहासचिव तथा प्रचार विभाग प्रमुख जगन्नाथ खतिवडाले बताए ।
सरकारलाई समर्थन गरि सरकारमा सामेल हुन लागेको एकीकृत समाजवादीले गृहसहित ठूला मन्त्रालयहरुमा दाबी गरिरहेको छ । वर्तमान गठबन्धनमा आवद्ध अन्य दलबाट राष्ट्रपति, उपराष्ट्रपति प्रधानमन्त्री तथा अन्य संवैधानिक निकायहरुमा समेत रहेको कारण आफूहरुले रोजेको मन्त्रालय पाउनुपर्ने एकीकृत समाजवादीका नेताहरुले दाबी गर्दै आइरहेका छन् ।
पार्टीको ५३ औं स्थायी कमिटीले ४ जना उपाध्यक्षहरू समेत स्थायी समितिमा थप गरेपछि अव पार्टीको स्थायी समितिको संख्या १९ पुगेको छ । अघिल्लो बैठकले सरकारलाई विश्वासको मत दिने र पार्टी संसद्को सत्ता पक्षमा बस्ने समेत निर्णय गरेको थियो ।
