काठमाडौं । त्रिभुवन विश्वविद्यालय अन्तर्गतका आंगिक तथा सम्बन्धनप्राप्त क्याम्पसहरुमा आज स्वतन्त्र विद्यार्थी युनियन (स्ववियु) को निर्वाचन हुँदैछ ।
बिहान ८ बजेबाट मतदान शुरु भएको हो ।
राजधानीका शंकरदेव, सरस्वती, नेपाल ल क्याम्पस, महेन्द्ररत्न क्याम्पस ताचहल, त्रिवि केन्द्रीय क्याम्पस, पुल्चोक क्याम्पस, थापाथली क्याम्पस, पद्मकन्या क्याम्पस, पब्लिकयुथ लगायत क्याम्पसहरुमा मतदान भइरहेको छ ।
यसअघि विद्यार्थी युनियनको निर्वाचनमा झैझगडा हुने गरेको भए पनि अहिलेसम्म शान्त वातावरणमा निर्वाचन भइरहेको छ ।
पुतलतीसडकमा रहेको शंकरदेव क्याम्पसमा पनि शान्त वातावरणमा मतदान भइरहेको नेविसंघबाट शंकरदेव क्याम्पसमा स्ववियु सभापतिका उम्मेदवार बनेका सुसान्त बस्नेतले जानकारी दिए ।
‘अहिले शान्त वातावरणमा मतदान भइरहेको छ ।’ उनले भने ।
साथै अन्य क्याम्पसहरुमा पनि शान्त वातावरणमा मतदान भइरहेको छ ।
त्रिवि युवा तथा खेलकुद निर्देशनालयका निर्देशक डा. पशुपति अधिकारीका अनुसार काठमाडौं उपत्यकाभित्रका कतिपय क्याम्पसहरुमा निर्वाचन बिथोलिएको छ ।
त्यसमा पाटन क्याम्पस, विश्वभाषा, रत्नराज्यलक्ष्मी क्याम्पस, नेपाल कमर्श क्याम्पस, पशुपति बहुमुखी क्याम्पस, त्रिचन्द्र बहुमुखी क्याम्पस, अमृत साइन्स क्याम्पस लगायतमा चुनाव हुन नसकेको उनले बताए ।
बिहान ८ बजेबाट अन्य क्याम्पसहरुमा भने मतदान भइरहेको छ । लामो समयदेखि निर्वाचन हुन नसकेका कारण विद्यार्थी नेताहरुमा मात्र नभएर विद्यार्थीहरुमा समेत उत्साह देखिएको छ ।
त्रिविको ६२ वटा आंगिक र १ हजार ४० आंगिक क्याम्पसहरुमा निर्वाचनको लागि त्रिविले कर्सुलर जारी गरेको थियो ।
लामो समयपछि स्वतन्त्र विद्यार्थी युनियनको निर्वाचन हुन लागेकाले विद्यार्थी नेता र विद्यार्थीहरुमा समेत उत्साह देखिएको छ । हरेक २–२ वर्षमा स्ववियु निर्वाचन हुनुपर्ने भएपनि २०६५ सालयता चुनाव हुन सकेको थिएन ।
