काठमाडौं । प्रधानमन्त्री एवं नेकपा (माओवादी केन्द्र) अध्यक्ष पुष्पकमल दाहाल ‘प्रचण्ड’ अहिलेको आठदलीय गठबन्धन पाँच वर्षसम्म टिक्ने बताएका छन् ।
कांग्रेसको संयोजन र व्यवस्थापनमा आठ राजनीतिक दलका प्रतिनिधिसभा र राष्ट्रिय सभा सदस्यलाई आज राष्ट्रपति निर्वाचनकेन्द्रित अभिमुखीकरण कार्यक्रमलाई सम्बोधन गर्दै प्रधानमन्त्री प्रचण्डले गठबन्धन दीर्घकालीन हुने पनि बताएका हुन् ।
‘हेर्दै जानुहोला यो गठबन्धन ५ वर्ष टिक्छ,’ प्रधानमन्त्री प्रचण्डले भने, ‘मन्त्रिपरिषद विस्तार प्रक्रिया आजैदेखि शुरु गर्छु ।’ प्रधानमन्त्री प्रचण्डले राष्ट्रपति निर्वाचन र उपराष्ट्रपति निर्वाचन सकिएलगत्तै विश्वासको मत लिने पनि बताए ।
कार्यक्रममा कांग्रेस, माओवादी केन्द्र, जनता समाजवादी पार्टी, एकीकृत समाजवादी, लोकतान्त्रिक समाजवादी पार्टी, जनमत पार्टी, राष्ट्रिय जनमोर्चा र नागरिक उन्मुक्ति पार्टीका सांसद सहभागी छन् । यही फागुन २५ गते राष्ट्रपति र चैत ३ मा उपराष्ट्रपति निर्वाचनका लागि मतदान हुँदैछ ।
आठ दलको समर्थनमा राष्ट्रपतिमा कांग्रेस नेता रामचन्द्र पौडेल उम्मेदवार छन् भने एमालेबाट सुवास नेम्वाङ उम्मेदवार छन् । आठ दलले संघीय सांसदलाई राष्ट्रपति निर्वाचनबारे प्रशिक्षण दिन शुरु गरेको छ । शुक्रबार सातै प्रदेशमा प्रदेश सभा सदस्यसँग अन्तर्क्रिया गर्ने आठ दलको तयारी छ ।
यो खबर पढेर तपाईलाई कस्तो महसुस भयो ?
प्रतिक्रिया