काठमाडौं । केन्द्रमा सत्ता समिकरणको परिदृष्य फेरिएसँगै त्यसको असर प्रदेशमा देखिन थालेको छ ।
वर्तमान सत्ता गठबन्धनबाट राष्ट्रपतिमा कुरा नमिलेपछि केन्द्रको समिकरण बिग्रिएसँगै प्रदेशहरुमा पनि एक अर्काले समर्थन फिर्ता लिने क्रम जारी रहेको छ ।
यता प्रदेश नं १ मा सत्तारुढ दल नेकपा माओवादी केन्द्रले भने तत्काल सरकारलाई दिएको समर्थन फिर्ता नलिने भएको छ ।
अहिले तत्काल सरकारलाई दिएको समर्थन फिर्ता लिने पक्षमा नरहेको माओवादी केन्द्र प्रदेश नं १ का संसदीय दलका नेता इन्द्रबहादुर आङ्बोले लोकपथलाई जानकारी दिए ।
‘अहिले सरकारलाई दिएको समर्थन फिर्ता लिनेबारे कुनै पनि निर्णण भएको छ । तत्कालको लागि त्यस्तो मनस्थिती छैन ।’ उनले लोकपथसँग भने ।
अहिले प्रदेश नं १ मा नेकपा एमाले नेतृत्वको सरकार रहेको छ । एमाले प्रदेश संसदीय दलका नेता हिक्मतबहादुर कार्कीले प्रदेश सरकारको नेतृत्व गरिरहेका छन् ।
सरकार सञ्चालनको लागि मुख्य साझेदार दल हो नेकपा माओवादी केन्द्र । यसअघि सरकार गठनका बेला पनि माओवादीले प्रदेशको नेतृत्व आफूहरुले गर्नुपर्ने माग गर्दै आइरहेको थियो । तर आधा–आधा कार्यकाल प्रदेशको नेतृत्व गर्ने सहमतिपछि मात्रै माओवादी सरकारमा सामेल भएको थियो ।
यता केन्द्रमा सरकारबाट बाहिरिएको राष्ट्रिय प्रजातन्त्र पार्टीले भने प्रदेशमा पनि सरकारलाई दिएको समर्थन फिर्ता लिएको छ ।
