काठमाडौं । नेपाल प्रहरीले ७८ लाख ५० हजार रुपैयाँसहित सहित हुण्डी कारोबारीलाई पक्राउ गरेको छ । काठमाडौं उपत्यका अपराध अनुसन्धान कार्यालयको टोलीले राजधानीको न्युरोडबाट कैलाली घर भइ बिजुली बजार बस्ने २३ वर्षीय किशोर चौधरी ५९ वर्षीय दिपेन्द्रबहादुर मल्ललाई पक्राउ गरेको हो ।
उनीहरुको साथबाट अठ्ठहत्तर लाख पचास हजार रुपैयाँ र चार लाखको चेकसमेत बरामद भएको कार्यालयका सूचना अधिकृत कृष्णप्रसाद कोइरालाले जानकारी दिए । उनीहरुलाई नेपाल राष्ट्र बैक ऐन २०५८ को दफा ९५ बमोजिम आवश्यक कारबाहीका लागि जिल्ला प्रहरी परिसर टेकु पठाइएको उनले बताए ।
प्रहरीका अनुसार मल्लले विगत ५ बर्षदेखि र किशोर चौधरीले विगत ४ महिना देखि न्यूरोड एरियामा रहेका विभिन्न व्यक्तिहरुबाट हुण्डीको रकम संकलन गर्ने र बैंक डिपोजिट मार्फत् रकम व्यवस्थापन गर्ने कार्य गर्दै आएको खुल्न आएको छ ।
उनीहरुको अर्का एक व्यक्तिको मातहतमा बसी दैनिक औषत १ करोड भन्दा माथिको रकम कारोबार गर्ने गरेको देखिएको प्रहरीको भनाइ छ ।
