दुई महिना पनि नटिक्दै सरकारबाट बाहिरियो रास्वपा

काठमाडौं । राष्ट्रिय स्वतन्त्र पार्टी (रास्वपा) सरकारबाट बाहिरिने निर्णय गरेको छ ।

आज पार्टी कार्यालय बसुन्धरामा बसेको निर्णायक बैठकले सरकारबाट बाहिरिने निर्णय गरेको हो ।

सरकारबाट बाहिरिने निर्णय गरेपनि सरकारलाई दिएको समर्थन भने कायम रहने निर्णय भएको रास्वपाकी सांसद चन्दा कार्कीले लोकपथलाई जानकारी दिइन् ।

‘आजको बैठकले सरकारबाट बाहिरिने तर समर्थन भने कायम रहने निर्णय भएको छ ।’ कार्कीले भनिन् ।

गत पुस १० गते प्रधानमन्त्रीमा पुष्पकमल दाहाल प्रचण्ड नियुक्त भएसँगै उपप्रधान एवं गृहमन्त्रीसहित रास्वपा सरकारमा सामेल भएको थियो ।

तर पार्टी सभापति रवि लामिछानेको नागरिकता अवैधानिक रहेको सर्वोच्चले फैसला गरेसँगै रास्वपाको राजनीतिमा हलचल आएको थियो । सबै पदबाट हटेका लामिछानेले पुनः नागरिकता लिएसँगै पुनः गृहमन्त्री बन्न प्रधानमन्त्रीसहित सत्तारुढ दलका शीर्ष नेताहरुसँग छलफल गरेका थिए । तर प्रधानमन्त्रीले गृहमन्त्री दिन नसकिने भनेसँगै आज बैठक बसेको थियो ।

हाल रास्वपाबाट सरकारमा शिक्षा, युवा तथा रोजगारमन्त्रीसहित एक राज्यमन्त्री रहेको थियो ।