नेकपा एमालेका सचिव योगेश भट्टराईले माधव नेपालले आफ्नै कारण राष्ट्रपति बन्ने अवसर गुमाएको टिप्पणी गरेका छन् ।
लोकपथ टिभीको कार्यक्रम कर्माणिसँग कुरा गर्दै नेता भट्टराईले भने, ‘पुस ९ गते एमाले अध्यक्ष केपी ओलीले संवादका लागि पठाएका व्यक्तिहरुसँग कुरा गरेर वातावरण सहज बनाएका भए अहिले राष्ट्रपति बन्ने सम्भावना थियो ।’
अब त्यो सम्भावना जिवित नै छ कि सकियो भन्ने हाम्रो प्रश्नमा उनले भने, ‘त्यसका लागि अब माधव नेपालले नै वातावरण सहज बनाउनुपर्छ । प्रचण्डलाई प्रधानमन्त्री बनाउने पार्टी अध्यक्ष ओलीलाई नेपाललाई राष्ट्रपति नबनाउनुपर्ने कारण थिएन ।’
नेपालको राजनीतिको नेतृत्व कांग्रेस र एमालेले नै गर्ने भन्दै कांग्रेस लोकतान्त्रिक र एमाले कम्युनिष्ट ध्रुवको नेतृत्वमा रहने प्रष्ट गरे । वर्तमान सरकार कांग्रेससँग माओवादीको कुरा नमिलेपछि एमालेले पहलकदमी लिएर बनेकोले कांग्रेसले सत्तामा भाग खोज्नु नैतिक नहुने पनि उनले बताए ।
एमाले र माओवादीबीच पुस १० गते भएको समझदारी अनुसार राष्ट्रपति एमालेले प्रस्ताव गरेकै व्यक्ति हुने भन्दै उनले त्यसमा दायाँबायाँ गरे प्रचण्डको विश्वसनीयतामाथि प्रश्न उठ्ने बताए ।
कांग्रेस र माओवादीबीचको गठबन्धन फुटाउन आफूहरुले चुनाव अघिदेखि नै प्रयास गरेको भए पनि बल्ल सरकार बनाउने बेलामा सफल भएको पनि उनले बताए ।
राष्ट्रपति पनि एमालेले भनेकै व्यक्तिलाई बनाउँदा राज्य संयन्त्र एमालेको मुठ्ठीमा पर्ने त्रास माओवादीभित्र देखिएकाले राष्ट्रिय सहमति बन्ने व्यक्ति खोजेको हो कि भन्ने जिज्ञासामा उनले भने, ‘ठीकै छ नि, एमालेले प्रस्ताव गरेका व्यक्तिमा सहमति बनाउन प्रधानमन्त्रीले प्रयास गरे भैहाल्यो नि ।’
राष्ट्रपतिलाई अनावश्यक रुपमा विवादमा तान्ने गरेको भन्दै उनले विद्या भण्डारीले नागरिकता विधेयक रोकेर देशको जनमत विभाजित हुनबाट रोकेको तर्क गरे । राष्ट्रपति रामवरण यादवले कट्वालकाण्डमा प्रचण्डको कदममा रोक लगाएर माओवादीबाट सत्ताकब्जा हुन रोकेकाले प्रशंसा गर्छु, भट्टराईले भने ।
अर्को प्रसंगमा उनले रास्वपाका सभापति रवि लामिछाने अब छोटो बाटोबाट गृहमन्त्री बन्नेतर्फ नलागुन् भन्दै चुनावबाट चुनिएर बन्दा राम्रो हुने सुझाव दिए ।
चितवन क्षेत्र नम्बर २ मा हुने उपचुनावमा एमालेले रविलाई नै समर्थन गर्न सक्ने पनि उनले बताए ।
यो खबर पढेर तपाईलाई कस्तो महसुस भयो ?
प्रतिक्रिया