काठमाडौं । प्रधानमन्त्री पुष्पकमल दाहाल ‘प्रचण्ड’ ले गृह मन्त्रालयको कार्यभार पनि सम्हालेका छन् । उपप्रधान तथा गृहमन्त्री रहेका रवि लामिछानेको नागरिकतासम्बन्धी विवादमा सर्वोच्च अदालतको संवैधानिक इजलासले सांसद र मन्त्रीबाट शुक्रबार पदमुक्त गरेको थियो ।
उक्त फैसलापछि लामिछानेले प्रधानमन्त्री प्रचण्डलाई राजीनामा बुझाएका थिए । उनले पदबाट राजीनामा दिएसँगै गृह मन्त्रालयको कार्यभार प्रधानमन्त्री प्रचण्डले नै सम्हालेका हुन् । प्रधानमन्त्रीको सिफारिसमा राष्ट्रपति भण्डारीले उक्त कार्यभार सम्हाल्ने गरी जिम्मेवारी तोकेको कार्यालयका सहायक प्रवक्ता लीलाकान्त पौडेलले जानकारी दिए ।
नेपाली नागरिकता पुनः प्राप्तिको प्रक्रिया पूरा नगरेको भन्दै सर्वोच्च अदालतले सांसद बन्न अयोग्य ठहर गर्दै सांसद पद खारेज गरिदिएको थियो । गत मंसिर ४ मा सम्पन्न प्रतिनिधि सभा निर्वाचनमा चितवन क्षेत्र नं. २ बाट प्रतिनिधिसभामा उनी निर्वाचित भएका थिए ।
यो खबर पढेर तपाईलाई कस्तो महसुस भयो ?
प्रतिक्रिया