काठमाडौं । नेकपा माओवादीनिकट विद्यार्थी संगठन अखिल क्रान्तिकारीमा भाँडभैलो भएको छ । अध्यक्ष नै बार्गेनिङमा संलग्न रहेको आरोप खेपिरहेकी छिन् ।
उक्त आरोप लागेकी अध्यक्ष पञ्चा सिंहलाई लेखा आयोग उपप्रमुख गम्भीर साउदले २४ घण्टे स्पष्टीकरण सोधेका छन् । अध्यक्ष सिंहले आफूमाथि लागेको आरोपको खण्डन गर्न नसकेको भन्दै प्रष्टीकरण सोधिएको हो ।
पोखरा विश्वविद्यालय र सीटीईभीटीमा आर्थिक बार्गेनिङ गरेको भन्दै अध्यक्ष सिंहमाथि संगठनका उपाध्यक्ष, कोषाध्यक्ष, केन्द्रीय सदस्यहरूले आरोप लगाउँदै आएका छन् ।
सिंहलाई सोधेको स्पष्टीकरणमा भनिएको छ, ‘तपाईँमाथि लगाएको आरोपको विषयउपर आजको दिनसम्ममा उचित जवाफ वा खण्डन आउन नसक्नुले तपाईँमाथि शंका गर्न मिल्ने ठाउँ बनेको छ ।’
पञ्चामाथि कुनै पनि कमिटीमा छलफल नगरी शैक्षिक मुद्दाहरूको तय, मुद्दाहरु उठानको प्रक्रिया र सम्बधित निकायमा प्रारम्भिकरूपमा बुझ्दा केन्द्रको निर्देशनमा चलखेल भएकै बुझिन्छ भनेर जारी भएको पत्र÷विज्ञप्ति÷ध्यानाकर्षण उपर तपाईँको धारणा के हो ? भनी प्रश्नसमेत गरिएको छ ।
