काठमाडौं । बिहीबारबाट नेकपा माओवादी केन्द्रको स्थायी कमिटी बैठक जारी छ ।
शुक्रबारको बैठकमा अध्यक्ष पुष्पकमल दाहाल प्रचण्डले बैठकमा पेश गरेको प्रतिवेदनलगायत समसामयिक विषयमाथि छलफल भइरहेको छ ।
निर्वाचन समीक्षा र वर्तमान राजनीतिक परिस्थितिबारे छलफल गर्न बोलाइएको माओवादी बैठकको पहिलो दिन अध्यक्ष प्रचण्डले पछिल्लो राजनीतिक अवस्थाबारे ‘ब्रिफिङ’ गरेका थिए । दोस्रो दिनको बैठकमा गत मंसिरमा सम्पन्न प्रतिनिधि सभा र प्रदेश सभा निर्वाचनमा पार्टीभित्र असहयोग र अन्तर्घात गर्नेहरुमाथि छानबिन समिति बनाएर छानबिन गर्नुपर्ने प्रस्ताव नेताहरुले गरेका छन् ।
चुनावी समीक्षाको क्रममा केही नेताहरुले निर्वाचनका बेला अन्तर्घात गर्नेहरुलाई कारबाही गर्नुपर्ने प्रश्ताव पेश गरिएको छ ।
बैठकमा उपाध्यक्ष तथा पार्टी एकताका लागि गठित कार्यदलका संयोजक कृष्णबहादुर महराले पछिल्लो प्रगतिबारे जानकारी गराएका छन् । माओवादीले नेकपा एकीकृत समाजवादी, नेपाल समाजवादी पार्टी, नेत्रविक्रम चन्द विप्लव नेतृत्वको नेकपालगायतका कम्युनिस्ट पार्टीहरुसँग एकताका लागि संवाद गरिरहेको छ ।
डा. बाबुराम भट्टराई नेतृत्वको नेसपासँग पार्टी एकता गर्ने सहमति गरिसकेको माओवादीले नेकपा एस, विप्लव लगायतका दलहरुसँग संवाद भइरहेको बताइएको छ ।
