काठमाडौं । प्रधानमन्त्री पुष्पकमल दाहाल प्रचण्डले जनताको समृद्धिका लागि सम्पूर्ण रुपमा समर्पित हुने प्रतिवद्धता जनाएका छन् ।
मारवाडी सेवा समितिको कार्यक्रममा बोल्दै प्रधानमन्त्रीले आर्थिक परिसूचकहरु राम्रो नरहेको भन्दै आफू चुनौती ब्यहोरेरै प्रधानमन्त्री बनेकाले सघाउन उद्योगी व्यवसायीलाई अपील गरे ।
उनले भने, ‘निजी र सरकारी क्षेत्रको सहकार्यबाट मात्र अर्थतन्त्रमा देखा परेका समस्याहरु समाधान गर्न सकिन्छ । देशमा देखिएका यस्ता समस्या समाधानका लागि यस समुदायबाट मद्दत पाउने अपेक्षा गरेको छु ।’
मारवाडीहरु नाफा मात्र होइन, सेवाका क्षेत्रमा पनि लगानी गर्ने समुदाय भएको भन्दै उनले नाफामा मात्र ध्यान केन्द्रित नगर्न आह्वान गरे ।
प्रधानमन्त्री प्रचण्डले भने, ‘उद्योगधन्दा, कलकारखाना, व्यवसायका साथै समाज सेवाको क्षेत्रमा पनि मारवाडी समुदायले योगदान गर्दै आएको र नेपालमा मात्र नभई संसारभर नै प्रशंसित रहेका छन् ।’
नेपालको आर्थिक गतिविधि बढाउन भारतबाट आमन्त्रित गरेर ल्याइएको यस समुदायको बहुआयामिक छबी र चरित्र बनेको पनि उनले उल्लेख गरे ।
प्रधानमन्त्री प्रचण्डले मारवाडी सेवा समितिले बनाउन लागेको तीन सय शैयाको निःशुल्क उपचार दिने अस्पतालका लागि सरकारका तर्फबाट जग्गा उपलब्ध गारउने बचन पनि दिए ।
