आमरण अनशनमा बस्ने योजनामा रहेका प्रेमले किन गरे अकस्मात् आत्मदाह !

काठमाडौं । बानेश्वरस्थित संसद भवन अगाडी आत्मदाह गरेका इलामका प्रेमप्रसाद आचार्यले त्यसअघि आमरण अनशन बस्ने योजना बनाएको खुलेको छ ।

दिवंगत आचार्य आमरण अनशन बस्ने योजनामा रहेको विषयको खुलासा भने राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले गरेका हुन् । आत्मदाह गर्नुअघि आफूसँग भएको कुराकानीमा प्रेमले ‘म आमरण अनशन बस्ने योजनामा छु,’ भनेको मिश्रले जानकारी दिएका हुन् ।

मिश्रले आफ्नो सामाजिक सञ्जाल फेसबुकमा प्रेमसँग भएको कुराकानीलाई उधृत गर्दै ‘म आमरण अनसश बस्ने योजनामा छु !’ भन्दै लेखेका छन्, ‘प्रेमजी, तपाईंले अस्ती विहान मलाई पठाएको सन्देश हो यो । तर त्यसको केही घण्टाभित्रै दिउँससम्ममा तपाईंले आत्मदाह रोज्नुभएछ ।’

आफूसहित मुलुकको नेतृत्व गर्नेहरुको विफलता स्वीकार्दै मिश्रले लेखेका छन्, ‘तपाईंले आत्मदाह–पूर्वको पत्रमा उल्लेख गर्नुभए झैँ तपाईंको आत्मदाह देशको परिवर्तनका लागि प्रयास गरिरहेका हामी कयौँ र दशकौँदेखि देशको नेतृत्वमा बसेकाहरूको विफलताको परिणाम हो ।’

तपाईंको वैकुण्ठ वास होस् र यो समाजलाई यति कुरूप बनाउनेहरूलाई विवेक मिलोस् भन्दै उनले नेपाली समाज अहिलेजस्तो पतित कहिल्यै नभएको पनि उल्लेख गरेका छन् ।

मिश्रले अगाडी लेखेका छन्, ‘अत्यन्तै पीडा भएको छ, प्रेमजी ! इमानदारीपूर्वक भन्दा, नेपाली समाज इतिहासमैँ यति ‘पतित’ कहिल्यै भएको थिएन । विगतमा हाम्रो समाज अशिक्षा, रूढिवाद र गरीवीबाट ग्रस्त थियो तर यो तहको ‘पतित–ता’ बाट ग्रस्त थिएन । त्यस्तो ‘पतित–ता’ जहाँ समाज र देश परिवर्तन गर्न सक्ने शिक्षा, आधुनिकता र सम्पन्नता भएकाहरूमा, अपवादलाई छोडेर, नैतिकता र मानवता शून्य भएको छ ।’

प्रेमको परिवारलाई आफूले पनि केही आर्थिक सहयोग गरेको उल्लेख गर्दै मिश्रले थपेका छन्, ‘तपाईंले ऋण तिर्नका लागि श्रीमतिलाई सहयोग गरिदिन गर्नुभएको अपीलमा मैले पनि सानो सहयोग गर्ने निर्णय गरेको छु । देशभित्र र बाहिर रहनुभएका सबै मनकारी नेपालीहरूलाई सहयोगका लागि हार्दिक अनुरोध गर्दछु !’