काठमाडौं । नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले बहुआयमिक व्यक्ति स्व लक्ष्मीदास मानन्धरको जीवन नयाँ पुस्ताका लागि प्रेरणाको स्रोत भएको बताएका छन् ।
भाषासेवी, धर्मसेवी, सफल उद्यमी, राजनीतिज्ञ एवं समाजसेवी स्व लक्ष्मीदास मानन्धरको जीवन पुस्तक ‘परिवर्तनका संवाहक लक्ष्मीदास’ को आज विमोचन गर्दै स्व.मानन्धरको जीवन सबैका निम्ति प्रेरणाको स्रोत बन्ने बताएका हुन् ।
‘हरेक व्यक्तिको जीवन फरक–फरक हुन्छ, कुन व्यक्तिले आफ्नो जीवनमा के राम्रो काम ग¥यो भन्ने कुरा जीवनी, आत्मवृत्तान्त, संस्करणबाट थाहा हुने भएकाले नयाँ पुस्तालाई समेत धेरै कुरा थाहा पाउन मद्दत पुग्छ’, उनले भने ।
पूर्वप्रधानमन्त्री नेपालले आफ्नो पहलमा लक्ष्मीदासलाई राष्ट्रियसभाको सदस्य बनाएको स्मरण गरे । लक्ष्मीदासको जीवन इतिहासको खुला पाना भएको उनको भनाइ थियो । इतिहासमा आफूले खेलेको भूमिका लिपिबद्ध गर्न सके त्यो लिपि जीवनभर बाँचिरहने नेता नेपालले बताए ।
लुम्बिनी विश्वविद्यालयका पूर्वउपकुलपति त्रिरत्न मानन्धरले काठमाडौं) को ठहिटीमा मध्यम परिवारमा जन्मिएका लक्ष्मीदासले आफ्नो बुद्धि, मेहेनत र परिश्रमले एउटा सम्पन्न परिवारको स्थापना गरेको तर्क गरे । स्व.लक्ष्मीदासले सामाजिक, धार्मिक, शैक्षिक र औधोगिक क्षेत्रमा महत्वपूर्ण योगदान दिएको उनको भनाइ छ ।
पुस्तकका लेखकद्वय लक्ष्मण अधिकारी र शुभेच्छाविन्दु तुलाधरले लक्ष्मीदासको जीवनको संघर्ष र सफलता तथा परोपकारी कार्यले हरेक मानिसलाई जीवनको अर्थ र मूल्य बुझ्न सघाउने बताए । लक्ष्मीदासले आफ्नो जीवनमा गरेका संघर्ष नयाँ पुस्ताका लागि उपयोगी हुने उनीहरुको भनाइ थियो ।
स्व.लक्ष्मीदासका कान्छा छोरा नारायणदास मानन्धरले पुस्तकमा आफ्नो बुवाको जीवनका पाइला, उतारचढाव र महत्वपूर्ण कार्य स्मरण गराउने कैयौँ महत्वपूर्ण सन्दर्भहरू रहेको बताए । उनले लक्ष्मीदासको जीवनीबाट हरेक व्यक्तिलाई समाजसेवी र कर्मयोगी बन्न प्रेरणा दिने विश्वास व्यक्त गरे ।
सोही अवसरमा नेपाली भाषाका अभियन्ता एवं साहित्यकार दुर्गालाल श्रेष्ठले लक्ष्मीदासका बारेमा लेखेको कविता वाचन गरेका थिए । सोही अवसरमा पूर्वमन्त्री जीवनराम श्रेष्ठ, बागमती प्रदेशका पूर्वमन्त्री एवं सांसद वसन्त मानन्धरको सहभागिता थियो ।
यो खबर पढेर तपाईलाई कस्तो महसुस भयो ?
प्रतिक्रिया