थप हवाई रुट खोलिदिन भारतीय राजदूतसँग मन्त्री किरातीको आग्रह

काठमाडौंं । संस्कृति पर्यटन तथा नागरिक उड्डयनमन्त्री सुदन किरातीले थप हवाई रुट खोलिदिन नेपालका लागि भारतीय राजदूत नविन श्रीवास्तवसँग आग्रह गरेका छन् ।

शुक्रबार मन्त्रालयमा भएको भेटघाटमा मन्त्री किरातीले सिमरामा रहेको नेपालको एक मात्र हवाई मार्गको अधिक चाप बढेको भन्दै थप हवाई रुट खोलिदिन आग्रह गरेका हुन् ।

मन्त्री किरातीलाई भेट्न भारतीय राजदूत मन्त्रायल पुगेका थिए ।

सो बारे जानकारी दिँदै मन्त्री किरातीले भनेका छन्, ‘नेपालका लागि भारतका राजदूत महामहिम श्री नवीन श्रीवास्तवले आज हामीलाई मन्त्रालयमा भेट गर्नुभयो । भेटवार्तामा हामीले सिमरामा रहेको नेपालको एक मात्र हवाई मार्गको अधिक चाप बढेको छ । त्यसैले थप हवाई प्रवेश मार्गका लागि अनुरोध महामहिम समक्ष गरियो ।’

सो क्रममा राजदूत श्रीवास्तवले नेपाली जनता र नेपालको हितमा भारत सरकार सधैं सकारात्मक हुने बताएको मन्त्री किरातीले जानकारी दिए ।