काठमाडौं । सरकारले पोखरामा भएको यती एयरलाइन्सको विमान दुर्घटनाप्रति शोक व्यक्त गर्दै आज देशभर सार्वजनिक बिदा दिएको छ ।
आइतबार बिहान भएको दुर्घटनापछि प्रधानमन्त्रीनिवास बालुवाटारमा बसेको मन्त्रिपरिषद्को आकस्मिक बैठकले राष्ट्रिय शोकका रूपमा देशभर सार्वजनिक बिदा दिने निर्णय गरेको हो ।
शोकमा आज देशभर राष्ट्रिय झण्डा आधा झुकाइने भएको छ । काठमाडौंबाट पोखराका लागि उडेको जहाज कास्कीको नयाँ गाउँस्थित सेतीको खोंचमा आइतबार दुर्घटना भएको थियो । दुर्घटनाबाट जनधनको ठूलो क्षति भएको छ ।
विमानमा ६८ जना यात्रुसहित ४ जना चालक दलका सदस्य गरी ७२ जना सवार थिए । हालसम्म ६९ जनाको शव भेटिएको छ भने बाँकी तीन जनाको शव खोजिकार्य भइरहेको छ । आज अत्यावश्यकबाहेकका सेवा र कार्यक्रम स्थगित गरिएको गृह मन्त्रालयका प्रवक्ता फणिन्द्रमणि पोखरेलले जानकारी दिए । मन्त्रालयका अनुसार २५ औँ राष्ट्रिय भूकम्प सुरक्षा दिवसको कार्यक्रम पनि स्थगित गरिएको छ ।
यती सबै उडान रद्द
यती एयरलाइन्सले विमान दुर्घटनाको शोकमा सोमबार सबै उडान रद्द गरेको छ । विमान दुर्घटनापछि एक सूचना जारी गर्दै एयरलाइन्सले आपत्कालीन र उद्दार उडानबाहेक नियमित सबै उडान रद्द गरेको जनाएको छ ।
परीक्षा सञ्चालन हुने
त्रिभुवन विश्वविद्यालयले लिने आजका परीक्षा भने नरोकिने भएको छ । सरकारले सार्वजनिक बिदा दिए पनि पूर्वनिर्धारित परीक्षा सञ्चालन गरिने त्रिभुवन विश्वविद्यालयका रजिष्टार डा. पेशल दाहालले जानकारी दिए ।
उनले सरकारले दिने आकस्मिक सार्वजनिक बिदामा विश्वविद्यालयका पूर्वनिर्धारित कार्यक्रमहरूले निरन्तरता नै पाउने गरेको बताए ।
यो खबर पढेर तपाईलाई कस्तो महसुस भयो ?
प्रतिक्रिया