सरकारको न्यूनतम साझा कार्यक्रमलाई आज अन्तिम रुप दिइँदै, एमाले र रास्वपाले पाउने मन्त्रालय पनि टुंग्गियो

काठमाडौं । सत्तारुढ दलहरुले आज सरकारको न्यूनतम साझा कार्यक्रमलाई अन्तिम रुप दिने भएका छन् । केही दिन यता कार्यक्रम तयार पारिरहेको कार्यदलले आज अन्तिम रुप दिने भएको हो ।

एमाले नेतृत्वमा बनेको सात दलीय गठबन्धनले सरकारको न्यूनतम साझा कार्यक्रम बनाउन उप्रधानमन्त्री विष्णु पौडेलको संयोजकत्वमा कार्यदल नै बनाएको थियो ।

उपप्रधान एवं गृहमन्त्री रवि लामिछानेले सरकारको न्यूनमत साझा कार्यक्रमलाई आज अन्तिम रुप दिइने जानकारी दिएका हुन् ।

बालुवाटारमा हिजो बसेको दलहरुको शीर्ष बैठकपछि संवाददाताहरुलाई उनले आज अन्तिम रुप दिएर भोलिसम्ममा सार्वजनिक गरिने जानकारी दिएका हुन् ।

हिजै बसेको दलहरुको बैठकले सत्तारुढ प्रमुख तीन दलबीच मन्त्रालय भागवण्डा पनि करिब टुंग्याएको छ । यद्यपि, मन्त्रिपरिषद्को विस्तार भने प्रधानमन्त्री पुष्पकमल दाहाल प्रचण्डले पुस २६ गते विश्वासको मत लिएपछि मात्र गरिनेछ ।

गृहमन्त्री रवि लामिछानेका अनुसार मन्त्रालय बाँडफाँट लगायतका समग्र विषयमा छलफल भएको थियो । स्रोतका अनुसार सत्तारुढ नेकपा एमालेले ९ मन्त्रालय पाउँदा, माओवादी केन्द्रले पाँच तथा राष्ट्रिय स्वतन्त्र पार्टीले तीन मन्त्रालय लिने सहमति भएको हो । रास्वपालाई थप एक राज्यमन्त्री दिन पनि दलहरु सहमत छन् ।

जनता समाजवादी पार्टी (जसपा) र राप्रपाका विषयमा भने मन्त्रालय टुंंगो लगाइसकिएको छैन ।