वर्तमान सरकार आधारभूत वर्गको हो : मन्त्री भण्डारी

काठमाडौं । बिना विभागीयमन्त्री दामोदर भण्डारीले वर्तमान सरकार आधारभूत वर्गको भएको बताएका छन् । काभ्रेपलाञ्चोकको बनेपामा आज आयोजित नेपाल टेलरिङ व्यवसायी महासंघको चारदिने ‘सीप सम्मेलन–२०७९’ एवं तालिम तथा सीप सप्ताहको उद्घाटन समारोहमा उनले वर्तमान सरकार जनमुखी एवं आधारभूत वर्गको श्रम र सीपमा विश्वास गर्ने सरकार भएको दाबीसमेत गरे ।

‘जनमुखी वर्तमान सरकार आधारभूत वर्गको श्रम र सीपमा विश्वास गर्ने सरकार हो, श्रम र सीपमा न्याय नपाउनेलाई सम्मानका साथ सम्बोधन गर्नेछौँ’, मन्त्री भण्डारीले भने । उनले आधारभूत वर्गको वर्गको हितमा लागेकाले आफूलाई पश्चिमका नागरिकले जनमत दिएको बताए ।

समृद्धिको यात्रा तय गर्ने क्रममा आधारभूत वर्गले न्याय पाउँदा श्रम र सीपको मूल्य पनि सरकारले बुझ्नुपर्ने उनको धारणा थियो । मन्त्री भण्डारीले भिन्न विचार भएका दललाई एकीकृत आकार दिई साझा मुद्दामा दललाई सहभागी गराएर वर्तमान सरकार निर्माण प्रक्रिया अघि बढेको उल्लेख गर्दै हाल पूर्णताः नपाएको सरकारले विश्वास प्राप्त गर्नुपूर्व सहमति गरेर अघि बढ्ने बताए ।

‘अहिलेको सरकार जनादेशबाटै तयार भएको हो, हामी न्यूनतम साझा उद्देश्य र लक्ष्य तय गर्दैैछौँ, साझा अवधारणा बनेपछि सरकारको यात्रा तय हुनेछ, अहिलेको कार्यक्रम यो हो भनेर जान्छौँ’, उनले भने । मन्त्री भण्डारीले विश्व बजारमा नेपालको जनशक्ति, श्रम र सीपले बजार प्राप्त गर्नुपर्नेमा त्यसो नभइरहकोमा दुःख व्यक्त गर्दै नेपाली बजार आयातितमा मात्रै निर्भर हुन नहुने बताए ।

उनले भने, ‘नेपाली श्रम र सीपका वस्तु निर्यात गरी विदेश तयारी वस्तुलाई निरुत्साहित गर्नुपर्ने आजको आवश्यकता हो ।’ उनले सरकारले नयाँ बजेट बनाउँदा नयाँ पन, नेपाली मन, राष्ट्रियता तथा मौलिकता झल्किने सीपलाई प्रवर्द्धन गर्ने बताए ।

कार्यक्रममा बनेपा नगरपालिका प्रमुख शान्तिरत्न शाक्य, पनौती नगर उपप्रमुख गीता बञ्जारा, नेपाल कपडा तथा सिलाई व्यवसायी महासंघका पूर्वअध्यक्ष विदुर बज्राचार्य, नेपाल उद्योग वाणिज्य महासंघका बागमती प्रदेश उपाध्यक्ष दुधराज श्रेष्ठ, काभ्रे उद्योग वाणिज्य संघका अध्यक्ष राजेन्द्र पसछे् लगायतले शुभकामना व्यक्त गरेका थिए ।

सो अवसरमा महासंघका अध्यक्ष गोपाल परियारले नेपालीको जनसंख्यामध्ये ३३ प्रतिशत स्कुल, कलेजका विद्यार्थी र कर्मचारीले बर्सेनि पोसाक लगाउने भएकाले यस व्यवसायमा सोहीअनुसारको सीपयुक्त जनशक्ति पूर्ति नभएको गुनासो गरे । सम्मेलनमा एक सय ५० व्यवसायी सहभागी छन् ।