काठमाडौं । जनता समाजवादी पार्टी (जसपा) नेपालको राजनीतिक समितिको बैठक आजदेखि सुरु भएको छ । ललितपुरको भोलढोकास्थित ज्यापू प्रज्ञा भवनमा बैठक पौष १८ र १९ गते दुई दिनसम्म चल्नेछ । बैठकमा विभिन्न ८ वटा राजनीतिक कार्यसूचीमाथि छलफल भइरहेको जसपाले जनाएको छ ।
जसपाले माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको सरकारलाई समर्थन गरे पनि सरकारमा जाने वा नजाने विषयमा कुनै निर्णय गरिसकेको छैन । कार्यकारिणी समितिको बैठकले यो विषय टुंगो लगाउने जिम्मा राजनीतिक समितिलाई दिएको थियो ।
बैठकबाट पछिल्लो राजनीतिक परिस्थिति, चुनावको समीक्षा, विधान अधिवेशन, सरकारको न्यूनतम साझा कार्यक्रम, सरकारमा सहभागिता र दलहरूसँग एकताका लागि वार्ता समिति गठन लगायतका कार्यकारिणी समितिको बैठकले तय गरेका एजेन्डाहरूमा निर्णय हुनेछ ।
यस्ता छन् कार्यसूची :
१) मुलुकको वर्तमान राजनीतिक परिस्थिति र हाम्रो पार्टीको भूमिका ।
२) प्रतिनिधि सभा/प्रदेश सभाको निर्वाचन सम्बन्धी समिक्षा ।
३) न्यूनतम् साझा नीति तथा कार्यक्रम र सरकारमा सहभागिता सम्बन्धमा ।
४) विभिन्न राजनीतिक दल/संगठनहरुसँग एकता, सहकार्य तथा गठबन्धन सम्बन्धी वार्ता गर्नका लागी वार्ता समिति गठन गर्ने सम्बन्धमा ।
५) संगठनात्मक कार्य सम्बन्धी प्रस्तावहरुः
क) क्रियाशील एवम् प्रभावकारी नरहेका पार्टीका विभिन्न समिति/संगठनहरुलाई क्रियाशील बनाउन आवश्यकता अनुसार विघटन, गठन/पुनर्गठन गर्ने सम्बन्धमा ।
ख) भ्रातृ/जनवर्गीय संगठन, पेशागत संगठन र ट्रेड युनियन लगायतका संगठनहरुलाई क्रियाशील तथा सुदृढीकरण गर्ने सम्बन्धमा ।
६. (क) विगतमा सम्पन्न भएका निर्वाचनहरुमा पार्टीका आधिकारीक उम्मेदवारहरुकोविरुद्ध उम्मेदवारी दिने, पार्टी भित्र अन्तर्घात गर्ने, निष्कृय रहने, असहयोग गर्ने र पार्टीविरुद्ध गतिविधिमा संलग्न हुने वा गतिविधि गर्ने पार्टी पदाधिकारी एवम् सदस्यहरुलाई तत् सम्बन्धित समितिहरुले पार्टी विधान अनुसार कार्यबाही गर्ने ।
६. (ख) संघीय परिषद् र केन्द्रीय समितिका सदस्यहरुको हकमा जाँचबुझ/छानबिन गरी आवश्यक कार्यबाहीको प्रक्रिया अगाडी बढाउन छानबिन समिति गठन गर्ने ।
७) पार्टी विधान अधिवेशनको लागि पार्टी विधानको मस्यौदा तयार गर्न ‘विधान मस्यौदा समिति’ गठन गर्ने सम्बन्धमा ।
८) विविध ।
यो खबर पढेर तपाईलाई कस्तो महसुस भयो ?
प्रतिक्रिया