कतार २२ औँ संस्करणको विश्वकप फुटबल आयोजना गर्न पूर्ण तयारी अवस्थामा पुगिसकेको छ । अब विश्वकपको ‘किकअफ’ हुन मात्र ७ दिन बाँकी छ । विगतका विश्वकपमा भन्दा यस पटकको विश्वकपमा दर्शकहरूले धेरै नै भिन्नता महसुस गर्न पाउनेछन् ।
विगतका विश्वकपमा पुरुषहरू मात्र फिफा रेफ्रीको भूमिकामा हुन्थे । यद्यपि, यस पटकको विश्वकपमा महिला फिफा रेफ्रीलाई पनि मैदानमा उतारिने छ । कतार विश्वकपका लागि ३६ फिफा रेफ्रीको छनोट समेत भइसकेको छ । तीमध्ये तीन जना महिला फिफा रेफ्रि (यामाशिता योशिमी, सलिमा मुकानसांगा र स्टेफनी फ्रापार्ट) छनोट भएका छन् ।
यामाशिता योशिमी
जापानकी फिफा रेफ्री यामाशिता योमिशी इतिहासकै पहिलो पटक विश्वकप खेलाउने महिला रेफ्रि बन्दै छिन् । ३६ वर्षीया यामाशिता योमिशीले यस अधि पनि फ्रान्समा सन् २०१९ मा आयोजना भएको महिला विश्वकपमा फिफा रेफ्रीको भूमिका निभाएकी थिइन् ।
त्यस्तै, उनले सन् २०२० को ओलम्पिक प्रतियोगितामा संयुक्त राज्य अमेरिका र स्विडेनबिचको खेल खेलाएकी थिइन् । यामाशिता एएफसी च्याम्पियन्स लिगमा मेलबर्न सिटी र जेओनम ड्रागनबीचको खेलमा पनि रेफ्रीको भूमिकामा थिइन् ।
मध्यपूर्वमा महिला रेफ्रीहरूको सङ्ख्या कमै रहेको छ, त्यसैले म त्यो उपलब्धिलाई उत्प्रेरणाको रूपमा लिएको छु– यामाशिताले भनिन् । महिलाहरूले पुरुषको विश्वकपमा पहिलो पटक अफिसिङ गरिरहेको तथ्य अरू व्यक्तिहरूका लागि महिलाको क्षमता बढ्दै गएको छ भन्ने सङ्केत हो, यो कुरा मैले महसुस गरेको छु – उनले थपिन् ।
स्टेफनी फ्रापार्ट
फ्रान्सेली स्टेफनी फ्रापार्ट आगामी विश्वकपका लागि सूचीकृत फिफा रेफ्रिहरु मध्ये सबैभन्दा लोकप्रिय मानिन्छिन् । ३८ वर्षीया स्टेफनीको यहाँ सम्म आइपुग्दाको सङ्घर्ष भने सहज थिएन । फ्रापार्ट फ्रान्समा भएको विश्वकप २०१९ मा सुपर कपको फाइनलमा अफिसियल थिइन् ।
सन् २०२० मा उनले रेफ्रीको संसारमा तरङ्ग नै मच्चाएकी थिइन् । पुरुष च्याम्पियन्स लिग खेलाउने पहिलो महिला फिफा रेफ्रि बनेर उनले इतिहासको पुस्तकमा आफ्नो नाम लेखाइन् । त्यसको एक वर्षपछि उनले एट्लेटिको म्याड्रिड र चेल्सीबीचको राउन्ड १६ को पहिलो लेगमा पनि रेफ्रीको भूमिकामा प्रस्तुत भइन् ।
त्यस्तै कतार विश्वकप अघि मात्रै उनले २०२२ को पोका डेल फ्रान्सको फाइनल खेलमा पनि उनी रेफ्रीको भूमिकामा प्रस्तुत भएकी थिइन् ।
उनले विश्वको सर्वश्रेष्ठ महिला रेफ्रीको पुरस्कार जितेकी छिन् । पुरुष विश्वकपमा महिला फिफा रेफ्रिहरूको उपस्थितिले बलियो सन्देश दिने स्टेफनी बताउँछिन् ।
सलिमा मुकनसांगा
रुवान्डाकी सलिमा मुकानसांगाले सन् २०१२ देखि फिफा रेफ्रिको जिम्मेवारी सम्हाल्दै आएकी छन् । तर उनको सपना भने प्रोफेसनल बास्केट बल खेलाडी बन्ने भन्ने थियो ।
‘मलाई बास्केटबल मन पर्थ्यो र यसलाई धेरै करिअरको रूपमा अगाडी बढाउन चाहन्थेँ’– उनले भनिन् । ‘तर बास्केटबलको पूर्वाधारमा पहुँच गाह्रो थियो, यसरी मैले फुटबलको रेफ्रिमा रुचि बढाउन थाँले । अहिले पुरुष विश्वकपमा रेफ्रीको भूमिका निभाउँदै छु ।’– उनले थपिन् ।
उनले सन् २०१९ महिला विश्वकप, २०२० मा टोकियो ओलम्पिक खेलमा फिफा रेफ्रीको रूपमा काम गर्दै अब कतार विश्वकपमा पनि रेफ्रीको भूमिकामा प्रस्तुत हुँदै छिन् । यस वर्षको सुरुमा पुरुष अफ्रिका कप अफ नेसन्समा पनि जिम्मेवारी लिएकी उनले विश्वकपको खेल आफूले खेलाउन पाउनु निकै ठुलो सफलता भएको बताउँछिन् ।
विश्वकपमा सहायक रेफ्रीहरू
फिफाले विश्वकपका लागि ६९ सहायक रेफ्री छनोट गरिएको छ । जसमा तीन जना महिला रेफ्रीहरू पनि रहेका छन् ।
यो विश्वकपमा निउजा ब्याक, मेकरिन डेज मेडिना रक्याथरिन नेस्बिट सहायक रेफ्रीका फुटबलको मैदानमा हुने छन् ।
यो खबर पढेर तपाईलाई कस्तो महसुस भयो ?
प्रतिक्रिया