२०७५, १४ कार्तिक बुधबार ०५:३२

मैत्रीपूर्ण खेलमा नेपालको शानदार जीत


प्रकाशित मिति : २०७५, १४ कार्तिक बुधबार ०५:३२

काठमाडौँ । ओलम्पिक छनोटको अन्तिम तयारीका लागि चीनमा रहेको नेपाली महिला राष्ट्रिय फुटबल टोलीले मैत्रीपूर्ण खेलमा जीत हात पारेको छ । 

मंगलवार राति सम्पन्न भएको  मैत्रीपूर्ण खेलमा नेपालले बेइजिङ स्पोर्टस् युनिभर्सिटीलाई ३–० गोल अन्तले पराजित गरेको हो । 

नेपाली टोलीको जितमा सावित्रा भण्डारी, दीपा न्यौपाने र इन्दिरा राईले समान एक-एक गोल गरेकी थिइन् । खेलको १६ औँ मिनेटमा सावित्राले पहिलो गोल गर्दै टिमलाई शुरुवाती अग्रता दिलाइन् । 
त्यस्तै दीपाले ५५ औँ तथा इन्दिराले ८२ औँ मिनेटमा गोल गरिन् । 

तीन मैत्रीपूर्ण खेलका लागि नेपाली टोली गत शुक्रबार चीन गएको हो । अन्तिम खेल नेपाली टोलीले बेइजिङ फोनिक्ससँग बुधवार खेल्नेछ । त्यसपछि नेपाली टोली कात्तिक १६ गते चीनबाट ओलम्पिक छनोट खेल्न म्यानमार जानेछ । 

नेपाली टोलीमा २२ खेलाडी, दुई प्रशिक्षक र दुई अफिसियल छन् । प्रशिक्षकमा हरि खड्का र मृगेन्द्रप्रसाद मिश्र, टोली नेतामा दीर्घबहादुर केसी र व्यवस्थापकमा कमला हीराचन थकाली रहेका छन् ।

ओलम्पिकको एसियन छनोटअन्तर्गत नेपाल रहेको समूहमा भारत, म्यानमार र बङ्गलादेश छन् ।

नेपालले कात्तिक २२ गते भारतसँग, २५ गते म्यानमार र २७ गते बङ्गलादेशसँग प्रतिस्पर्धा गर्नेछ ।

नेपाली टोलीमा गोलकिपर एन्जिला तुम्बोप्पो सुब्बा, रुपा रानामगर, लीला लाम्गाडे, डिफेन्डरमा गीता राना, रञ्जना दर्जी, हीराकुमारी भुजेल, मनमाया लिम्बू, अमृता जैसी, मेनुका गिरी, कविता धिमाल, पुनम मगर, मिडफिल्डरमा रेनुका नगरकोटी, दीपा राई, इन्दिरा राई, विमला चौधरी, दीपा अधिकारी, अनिता बस्नेत, दीपा न्यौपाने तथा स्ट्राइकरमा अनिता केसी, सावित्रा भण्डारी, निरु थापा र शर्मिला थापा रहेका छन् । 

प्रतिक्रिया दिनुहोस