उम्मेदवार गाउँगाउँ पसेपछि मतदाता खुसी

सुर्खेत । जाजरकोट बारेकोट गाउँपालिका–१ रामीडाडाँकी रामकली बुढा माओवादी केन्द्रका उपहासचिव आफ्नो गाउँमा पुग्दा दंग परिन् । लिम्सामा आयोजित प्रशिक्षण कार्यक्रममा घरको कामले जान नपाएकी बुढाले आफ्नो गाउँमा बास बस्न शक्ति बस्नेत आएपछि जनयुद्धमा गुमाएको छोराले घर खोज्दै आएझैँ मनमा लागेको बताइन् ।

उनका छोरा कालीबहादुर बुढाको २०६१ सालमा दोहोरो भिडन्तमा परी मृत्यु भएको थियो । ‘मेरो छोराको ठाउँमा कालेगाउँको एक सामान्य किसानको छोरा मेरो छोराको सपना पूरा गर्न गाउँगाउँमा आउँदा म आमाको मन किन खुसी नहुने ? यही परिवर्तनका लागि हामीले छोरालाई जनयुद्धमा पठाएका थियौँ । अहिले गाउँमा मोटरबाटो, टेलिफोन आएको छ । यो सबै हाम्रो छोराको बलिदानले आएको हो,’ उनी भन्छिन् ।

पूर्वमन्त्रीसमेत रहेका बस्नेतको नजिकै आएर उनले ‘बाबु मेरो छोराको बलिदानी खेर नजाओस् है, बारेकोटमा राम्रो विकास भएको छ, अझै होस्’ भनिन् । बस्नेतले रामकली बुढालाई तपाईको छोराको सपना पूरा गर्न दिनरात लागिपरेको बताए । बारेकोट–४ की सिर्जना बस्नेतले बारेकोटको विकासमा माओवादी आन्दोलनको विजय भएको बताइन् ।

उपमहासचिव बस्नेत गाउँगाउँ पुग्दा सर्वसाधारणले विकास निर्माणदेखि सहिदको सपना पूरा गर्न आग्रह गर्दै फेरि पनि मन्त्री भएर आउन आशीर्वाद दिए । नौ महिना गृहमन्त्री, चार महिना स्वास्थ्यमन्त्री र दुई वर्षभन्दा बढी समय वनमन्त्री भइसकेका बस्नेत माथिल्लो तहमा पुग्ने जाजरकोटको पहिलो नेता हुन् ।

बस्नेतसँग एमालेका युवा नेता निरज आचार्य प्रतिस्पर्धामा उत्रिएका छन् । अघिल्लो चुनावमा बस्नेतलाई जिताउन लागेका आचार्य पो पटक शक्तिसँग चुनावी मैदानमा भिडेका छन् । उनीसँगै स्वतन्त्र उम्मेदवार नरबहादुर कार्की चुनावी मैदानमा छन् ।