काठमाडौँ, १ कात्तिक – स्थानीय तहमा खटाइएका शिक्षा सेवाका उपसचिवहरूलाई न बस्ने ठाँउ उपलब्ध गराइएको छ, न त जिम्मेवारी नै दिइएको छ । उनीहरूको पदको नाम समेत तोकिएको छैन । उनीहरू बिहान कार्यालय पुग्छन्, हाजिर गर्छन् र निराश हुँदै फर्कन्छन् । महिनौदेखि उनीहरूको यस्तै दैनिकी छ ।जिल्ला शिक्षा कार्यालयले मङ्गलबार आयोजना गरेको जिल्लास्तरीय अभिमुखीकरण कार्यक्रममा काठमाडौँ महानगरपालिकामा खटाइएका उपसचिव प्रह्लाद अर्यालले आफूहरूको हालसम्म पनि पदको नाम नदिइएको गुनासो गर्दै भने, “बस्ने स्थानको टुङ्गो छैन । बबरमहलस्थित जिल्ला समन्वय समितिको कार्यालयमा एउटा कोठा दिने भनिएको छ । ”बस्ने स्थान र जिम्मेवारीको टुङ्गो नलगाइदिएकाले आफूहरूलाई फिर्ता पठाइदिन स्थानीय तहका प्रमुखहरूसँग त्यहाँ पुगेका शिक्षा सेवाका कर्मचारीहरूले भन्न थालेका छन् । उनीहरूले दसैँअघि शिक्षकलाई तलब खुवाउने कामसम्म गरेका छन् । शिक्षा विभागले सबैलाई नपुग्ने गरी तलब पठाएकोमा शिक्षकहरूले स्थानीय तहमा खटिएका शिक्षा सेवाका उपसचिवहरूसँग निकै करकर गर्ने गरेको गुनासो उनीहरूको छ, गोरखापत्रले खबर छापेको छ ।
