काठमाडौं । संस्कृति, पर्यटन तथा नागरिक उड्डयन मन्त्री जीवनराम श्रेष्ठले काठमाडौंको डल्लु आवास क्षेत्रमा निर्माण हुने बहुउद्देश्यीय कभर्ड हलको शिलान्यास गरेका छन् ।
नेपाल ओलम्पिक कमिटीका अध्यक्षसमेत रहेका मन्त्री श्रेष्ठले अन्तराष्ट्रिय ओलम्पिक कमिटीको सहयोगमा निर्माण हुने ‘भुकम्प स्मृति बहुउद्देश्यीय कभर्ड हल’ को आज (शनिवार) काठमाडौं–१५ स्थित डल्लु आवास क्षेत्रमा शिलान्यास गरेका हुन् ।
साढे ४ करोड लागतमा बन्ने कभर्ड हलमा राष्ट्रिय तथा अन्तर्राष्ट्रिय खेलकुद प्रतियोगिता तथा तालिमहरु सञ्चालन गर्न सकिने मन्त्री श्रेष्ठले बताए । बहुउद्देश्यीय कभर्डहल ६ रोपनी जग्गामा निर्माण हुनेछ ।
कभर्ड हलमा भलिबल, ब्याडमिन्टन, टेबल टेनिसखेलका साथै ध्यान, योग, सेमिनारजस्ता कार्यक्रम सञ्चालन गर्न समेत सकिनेछ ।
स्थानीय स्तरमा खेलाडी उत्पादनमा पनि कभर्डहलले सहयोग गर्ने पनि मन्त्री श्रेष्ठले बताए । कभर्ड हल निमार्ण कार्य नौ महिनाभित्र सम्पन्न हुनेछ ।
यो खबर पढेर तपाईलाई कस्तो महसुस भयो ?
प्रतिक्रिया