१३ वर्षमा बिहे, १६ वर्षमा सम्बन्धमा विच्छेद

बागलु, ३१ असोह- जिल्लाको तमानखोला गाउँपालिका-१ का १३ वर्षीया सुनिता गोतामेले कक्षा ५ मा पढ्दापढ्दै बिहे गरिन् । आफ्नै फुपुले बुर्तिबाङ बजार जाउँ भनेर फकाई फुलाई ल्याएर तमान २ सिलगुमका किसान विकसँग बिहे गराइदिइन् । रमाइलो गरेर लाउँलाउँ खाउँखाउँ भन्ने बेला सुनिता उमेरको अपरिपक्वता, घर व्यवहार, त्यसमाथि सासू ससुराको दुव्र्यवहारले आजित हुँदै थिइन्, अन्नपूर्ण पोस्टमा खबर छ ।बिहे गरेको तीन वर्ष नबित्दै श्रीमान्ले अर्को बिहे गरेपछि त उनको रंगीन सपनाको यात्रामा पूर्णबिराम लाग्यो । सानैमा बिहे गरेका श्रीमान्ले अर्की श्रीमती ल्याएपछि अहिले उनले किसानसँग सम्बन्ध विच्छेद गरिन् । मंसिर मसान्तभित्र केटा पक्षले ३ लाख रुपैयाँ दिने सहमतिपछि उधारो सम्बन्ध बिच्छेद गरेको उनले बताइन् । अहिले १६ वर्षमा टेकेकी उनी छिटो बिहे गरेकोमा पछुतोमा छिन् । ‘बिहे र जीवनबारे केही थाहा थिएन, त्यस्तो बेलामा फकाएर जबरजस्ती बिहे गरिदिए’, माइतीमा बस्दै आएकी उनले आँखाभरि आँसु बनाउँदै भनिन्, ‘मेरो अब केही सपना रहर छैनन्, अब यिनै बा आमासँग दुखजिलो गरेर बाँच्छु, जिन्दगी जाने कुरामा कसैले पनि खेलवाड नगर्नुहोला ।’