काठमाडौं । बंगलादेशमा जारी साफ च्याम्पियनसिपको सेमिफाइनलमा नेपालले माल्दिभ्सको सामना गर्ने भएको छ ।
समूह ‘ए’को विजेता बन्दै सेमिफाइनलमा पुगेको नेपालले समूह ‘बी’ को उपविजेता बनेको माल्दिभ्ससँग यहि बुधवार फाइनल प्रवेशको लागि भिड्ने भएको हो ।
त्यस्तै, भारत समूह ‘बी’को विजेता बनेको भारतले समूह ‘ए’को उपविजेता पाकिस्तानसँग खेल्नेछ ।
बुधवार हुने नेपाल र माल्दिभ्सबीचको सेमिफाइनल खेल नेपाली समयनुसार ३ः४५ बजे ढाकास्थित बंगबन्धु रंगशालामा प्रतिस्पर्धा गर्नेछ । दोस्रो सेमिफाइनलमा त्यहि दिन साँझ ७.४५ बजे भारत पाकिस्तानसँग खेल्नेछ ।
समूह चरणको पहिलो खेलमा पाकिस्तानसँग २–१ ले पराजित भएको नेपालले भुटानलाई ४–० र बङ्गलादेशलाई २–० ले पराजित गर्दै सेमिफाइलन प्रवेश गरेको हो । नेपालले दुई गोल खाँदा ७ गोल गर्न सफल भइसकेको छ ।
माल्दिभ्सले श्रीलङ्कासँग गोलरहित बराबरी खेलेको थियो भने भारतसँग २–० ले पराजित भएको थियो । जारी प्रतियोगितामा दुई खेल खेलेको माल्दिभ्सले गोल गर्न सकेको छैन भने दुई गोल खाएको छ ।
सेमिफाइनलमा पुगेका चारमध्ये भारतले सर्वाधिक ७ पटक तथा माल्दिभ्सले एक पटक साफ च्याम्पियनसिपको उपाधि जितिसकेका छन् ।
नेपाल र पाकिस्तानले भने अहिलेसम्म सेमिफाइनल भन्दा माथि पुग्न सकेका छैनन् । पाकिस्तान १३ वर्षपछि तथा नेपाल पाँच वर्षपछि अन्तिम चारमा पुगेको हो ।
माल्दिभ्सले घरेलु भूमी र श्रीलङ्कामा संयुक्त रुपमा आयोजना गरिएको सन् २००८ को उपाधि जितेको थिया । भारतले सन् १९९३, १९९७, १९९९, २००५, २००९, २०११ र २०१५ मा उपाधि जितिसकेको छ ।
यो खबर पढेर तपाईलाई कस्तो महसुस भयो ?
प्रतिक्रिया