काठमाडौं– नेपाली कांग्रेसका उपसभापति धनराज गुरुङले मुलुक र व्यवस्थालाई समृद्धिसँग जोड्ने अर्जुनदृष्टि राख्न आवश्यक रहेको बताएका छन् । उनले सधै देश गरिब बनाएर काम गर्न नहुने भन्दै सरकार सञ्चालनकर्ताले मुलुक र व्यवस्थालाई समृद्धिसँग जोड्ने अर्जुनदृष्टि राख्न आवश्यक रहेको बताए ।
नेपाल ट्रेड युनियन कांग्रेसले मंगलबार काठमाडौंमा आयोजना गरेको स्वर्गीय नेता गिरिजाप्रसाद कोइरालाको शालिक अनावरण कार्यक्रममा बोल्दै उनले यस्तो बताएका हुन् । गुरुङलले एकअर्कालाई आरोपप्रत्यारोप लगाउने बेला नभएको औंल्याए । गठबन्धनभित्रका दलहरूले कांग्रेस इमान्दार भएन भनेर झगडा गर्दा संविधान नजोगिने उनको भनाइ छ । ‘हाम्रो मिसन भनेको संविधान जोगाउने मिसन हो । हामीले जहाज ल्याण्डिङ नगर्दै एकले अर्कालाई आरोप प्रत्यारोप लगाउने हो भने, हामी अपरिपक्व राजनीतिज्ञ हौं । हामी आफैले प्रमाणित हुन्छ । उनले भने, मलाई लाग्छ, यो कुरा आउने मंसिरतिर सायद जहाज सेफ ल्याण्डिङ गर्नसक्छौ भन्ने विश्वास छ ।,’
उसभापति गुरुङले गठबन्धन टुटे देश दुर्घटनातर्फ जाने समेत बताएका छन् । उनले गठबन्धनरूपी विमान आकाशमै रहेकोले सुरक्षित अवतरण नगरे दुर्घटनातर्फ जाने बताए । उनले भने, ‘स्थानीय निर्वाचनमा हामी पाँच दल एउटै जहाज चढ्यौ । जहाज उडिसकेको छ, आकाशमा छ तर ल्याण्डिङ भएको छैन । अब हामीले त्यो जहाजलाई सेफ ल्याण्डिङ कसरी गर्ने? भनेर चिन्तन र चिन्ता गरिरहेको बेलामा त्यही जहाजभित्र बसेर साथीहरूले ङ्यारङ्यार ङुरङुर गर्न हुन्न भन्ने मेरो ठहर छ ।
जहाजलाई सेफ ल्याण्डिङ गर्नेपर्ने हाम्रो दायित्व छ । सेफ ल्याण्डिङ गर्ने बेलामा कसैले कांग्रेस इमान्दार भएन भन्ने, अर्को दल इमान्दार भएन भनेर आकाशमा उडिरहेको जहाजमाथि हामीले झगडा सुरु गर्ने हो भने जहाजले सेफ ल्याण्डिङ गर्न सक्दैन ।’
