कञ्चनपुर । कञ्चनपुरकी १३ वर्षीय बालिका निर्मला पन्तको हत्याको आरोपमा प्रहरीले बबिता बम र आँचल भनिने रोशनी बमलाई पक्राउ गरेको छ । उनीहरु दिदी बहिनी हुन् ।
शनिवार बिहान भीमदत्त नगरपालिका वडा नं. १८ स्थित आफ्नै घरबाट उनीहरुलाई प्रहरीले पक्राउ गरेको हो ।
गत साउन १० गते आफ्नी साथी रोशनीलाई भेट्न उनको घर गएका बेला निर्मला बेपत्ता भएकी थिइन् ।
दुई तले घरमा बबिता र रोशनी मात्रै बस्दै आएका थिए भने उनीहरुका बाबुआमा दार्चुलामा बस्थे ।
निर्मलाको हत्यापछि भने बाबुआमा सोही घरमा बस्न थालेका छन् ।
दुई जना मात्रै बस्दै आएको उक्त घरमा बम दिदी बहिनीलाई भेट्न एसपी डिल्लीराज विष्टका छोरा र मेयर सुरेन्द्र विष्टका भतिज प्रायजसो आइरहने गरेको स्थानीयबासीको भनाइ छ ।
साउन १० गते बेपत्ता भएको निर्मलाको शव भोलिपल्ट बिहान उखुबारीमा फेला परेको थियो ।
रातभरी पानी परेको भएतापनि निर्मलाका किताब भने पानीले भिजेका थिएनन् । यस्ता रहस्यमय तथ्यहरु खुल्दै जाँदा बम दिदीबहिनी पनि शंकाको घेरामा परेका हुन् ।
प्रहरीले यही विषयमा अनुसन्धान गर्न उनीहरुलाई पक्राउ गरेको हो ।
यो खबर पढेर तपाईलाई कस्तो महसुस भयो ?
प्रतिक्रिया