खोटाङ- कारागारबाट फरार एक कैदी १३ वर्षपछि पुनः पक्राउ परेका छन् ।
पक्राउ पर्नेमा दिक्तेल रुपाकोट मझुवागढी नगरपालिका–११ खार्मीका ३६ वर्षीय वीरबहादुर तामाङ रहेको छ । उनी २०६२ साल असार ५ गते कारागारबाट भागेका थिए । प्रहरीले उनलाई आज घरैबाट पक्राउ गरेका हुन् ।
पक्राउ परेका तामाङलाई बिहीबारै जिल्ला अदालतमा हाजिर गराएर कारागार चलान गरिएको जिल्ला प्रहरी कार्यालय खोटाङका प्रहरी नायव उपरीक्षक राजकुमार केसीले जानकारी दिए ।
विसं २०६० असोज १५ गते स्थानीय २१ वर्षीय नवराज दाहालको हत्या गरेको अभियोगमा तामाङसहित तीन जना पक्राउ परी पुर्पक्षका लागि कारागारमा रहेका थिए । जिल्ला अदालत खोटाङले २०६३ चैत ६ गते तीनै जनालाई २०÷२० वर्ष कैद सजाएको फैसला गरेको थियो ।
दाहालको हत्या लगत्तै पक्राउ परेका उनीहरुले दुई वर्ष नौ महिना १० दिन कैद भुक्तानी गरिसकेका थिए ।
यो खबर पढेर तपाईलाई कस्तो महसुस भयो ?
प्रतिक्रिया