भक्तपुर । नेपाल इन्जिनियरिङ कलेज (नेक) मा दक्षिण एसियाको निर्माण क्षेत्रको समसामयिक प्राविधिक विषयक गोष्ठी शनिबार सम्पन्न भएको छ । नेक र भारतको आईआईटी बम्बईको आयोजनामा संयुक्त अन्तर्राष्ट्रिय गोष्ठी सम्पन्न भएको हो । गोष्ठीमा नेक, भारतको आईआईटी बम्बई र भुटानको विश्वविद्यालयका शोधकर्ता, शिक्षक र स्नातकोत्तर स्तरका विद्यार्थीहरू सहभागी भएका थिए ।
गोष्ठीमा पोखरा विश्वविद्यालयको प्रतिनिधिकोरूपमा नेकको सञ्चालक समितिका सदस्य उपप्राध्यापक इन्जिनियर अर्जुन गौतम, आईआईटी बम्बईका प्राध्यापक वेङ्कट सन्तोषकुमार, रोयल युनिभर्सिटी अफ भुटानका प्राध्यापक हेमलाल भट्टराई र नेकका प्राचार्य प्रा। डा। हरिकृष्ण श्रेष्ठले गोष्ठीको महत्त्वबारेमा प्रकाश पारेका थिए ।
उक्त अन्तर्राष्ट्रिय गोष्ठीको दुई वटा मूल विषयहरू निर्माण क्षेत्रमा सुरक्षा र मजदुर थकान व्यवस्थापनु तथा सामग्री आपूर्ति साङ्लो व्यवस्थापनुमा केन्द्रित रहेर नेक तथा आईआईटी बम्बईका स्नातकोत्तर कार्यक्रममा विद्यार्थीले स्थलगत अनुसन्धानको क्रममा आफूहरूले देखेको भोगेको तथ्याङ्कहरू विश्लेषण गरी शोधको परिणाम प्रस्तुत गरेका थिए । आईआईटी बम्बईका शोधकर्ताहरू किशोर भगत र अभिषेकराज सिंहले शोध भ्रमणको नेतृत्व गरेका थिए ।
शोध भ्रमणको क्रममा दुवै शैक्षिक संस्थाका विद्यार्थीहरूले दुई हप्तासम्म नेपालका ६ वटा ठूला निर्माणस्थलहरू भ्रमण गरी प्राविधिक तथा मजदुरहरूसँग अन्तरक्रिया पनि गरेका थिए । निर्माण स्थलहरूमा अपनाउनुपर्ने सुरक्षाका न्यूनतम उपायहरू, थकित मजदुरहरूको उचित व्यवस्थापन, निर्माण सामग्री आपूर्तिकर्ता चयनमा अपनाउनुपर्ने वैज्ञानिक विधि जस्ता विषयहरूमा सामग्री प्रस्तुतकर्ताहरू र सहभागीहरूबीच प्राविधिक तथा कानुनी पक्षमा छलफल भएको थियो ।
नेपाल, भारत र भुटानका विद्यार्थीहरूले दुई हप्तासँगै काम गर्दा आफूहरूले भोगेका गैरप्राविधिक विषयहरूमा आपसी अनुभवहरू र पाएको शिक्षा आदानप्रदान गरेका थिए । समूहमा मलेर काम गर्ने सीप, भिन्न भाषा तथा संस्कृतिको कारण आउनसक्ने असमझदारी तथा वाधा जस्ता समस्याहरू कसरी समाधान गर्न सकिन्छ भन्ने विषयमा पनि गोष्ठीमा छलफल भएको थियो ।
अन्तर्राष्ट्रिय गोष्ठीको उपजको रूपमा आएका सिफारिसहरू कार्यान्वयनमा लान सकिए दक्षिण एसियाकाकै निर्माण व्यवस्थापनमा सुधार आउनसक्ने प्राचार्य प्रा। डा। हरिकृष्ण श्रेष्ठले धारणा राखे । नेकका सहायक प्राचार्य सहप्राध्यापक दुर्गाप्रसाद भण्डारीले गोष्ठी आयोजनामा प्रमुख भूमिका निभाएका थिए । शोध भ्रमणको संयोजन आईआईटी बम्बईका पूर्व विद्यार्थी सलिलराज अर्यालले गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया