काठमाडौँ, २९ असोज । निवर्तमान उपसभामुख गंगाप्रसाद यादव संसद विघटन भएको भोलिपल्टै नेकपा एमालेमा प्रवेश गरेका छन । आइतबार बिहान एमाले अध्यक्ष केपी शर्मा ओलीको निवास बालकोटमा आयोजित एक कार्यक्रममार्फत यादव एमालेमा प्रवेश गरेका हुन। कार्यक्रममा अध्यक्ष ओलीले स्थानीय तहको चुनावमा विविध कारणले २ नम्बर प्रदेशमा एमाले दोस्रो पार्टी भएको उल्लेख गर्दै अबको चुनावमा पहिलो पार्टी नै हुने दाबी गरे । उनले आगामी प्रदेश र प्रतिनिधिसभाको निर्वाचनमा एमाले पहिलोमात्रै होइन, अत्यधिक बहुमतसहितको ठूलो पार्टी हुने दाबी गरे । राप्रपा नेपालबाट समानुपातिक सांसद बन्नुभएका यादव ०७२ असोज २९ गते उपसभामुख चयन हुनुभएको थियो । उनले पछिल्लो समय राष्ट्रियताका सवालमा एमालेले लिएको अडानबाट आफु प्रभावित भएको बताए ।
