संखुवासभाको जिसस प्रमुखमा समाजवादीका शाक्य निर्वाचित

काठमाडौं । जिल्ला समन्वय समिति संखुवासभाको प्रमुखमा सुमन शाक्य निर्विरोध निर्वाचित भएका छन् । नेकपा (एकीकृत समाजवादी) का शाक्य पुनः दोस्रो पटक प्रमुखमा निर्वाचित भएका हुन् ।

जिसस संखुवासभाको प्रमुखमा सत्ता गठबन्धन दलले समाजवादीका शाक्यलाई उम्मेदवार बनाएको थियो । स्वतन्त्र उम्मेदवार राजेन्द्र घलेको उम्मेदवारी खारेज भएपछि समाजवादीका शाक्य निर्विरोध निर्वाचित भएका हुन् ।

जिससमा प्रमुख, उपप्रमुखसहित सबै पदमा गठबन्धनको प्यानल नै विजयी भएको हो । नेकपा ९एमाले० ले घलेलाई जिसस प्रमुखमा प्रस्ताव र समर्थन गरी उम्मेदवार बनाएको थियो । स्वतन्त्र उम्मेदवार घलेको उम्मेदवारी स्थानीय तह निर्वाचन निर्देशिकाको दफा ४५ ९३० बमोजिम खारेज गरिएको मुख्य निर्वाचन अधिकृत शान्तिप्रसाद आचार्यले जानकारी दिए ।

त्यस्तै उपप्रमुखमा नेपाली काँग्रेसकी बबिता खत्री निर्वाचित भएकी छन् । उनी एमालेकी रेनुका माया गुरुङलाई तीन मतले पराजित गर्दै विजयी भएकी हुन्। विजयी खत्रीले ११ मत प्राप्त गर्दा पराजित गुरुङले आठ मत पाएकी छन्। जिससको खुल्ला सदस्यमा माओवादी केन्द्रका मणिराज खत्री, नेपाली काँग्रेसका छेदर भोट र मनोजकुमार थायुम निर्वाचित भएका छन् ।

महिला तीन सदस्यमा माओवादी केन्द्रकी अरिता राई, शान्तिदेवी राई र कांग्रेसकी भत्तीमाया गुरुङ विजयी भइन् । दलित वा अल्पसंख्यक सदस्यतर्फ काँग्रेसकै देउमान राई विजयी भएका छन् ।