नेविसंघको म्याद तीन महिना थपियो

काठमाडौं ।  नेपाल विद्यार्थी संघको निर्वाचित कार्यसमितिको म्याद तीन महिना थपिने भएको छ ।  आगामी तीन महिनाभित्र महाधिवेशन गर्ने समझदारी नेविसंघका नेतृत्वबीच भएसँगै पार्टीले निर्णय गर्न लागेको हो । 

यो समझदारीसँगै सहमहामन्त्री डा प्रकाश शरण महत संयोजक रहेको निर्देशक समितिले तीन महिना नेविसंघको म्याद थप्न सहमत भएको बताइएको छ । 

निर्देशक समितिका सदस्य प्रदीप पौडेलले  नेविसंघका प्रमुख नेतृत्वले सहमतिमै तीन महिनाभित्र महाधिवेशन गर्न सकिने कार्ययोजना ल्याएपछि संगठनको म्याद तीन महिना थपिन लागिएको जानकारी दिए ।

यसअघि निर्देशक समितिले आगामी तीन महिनाभित्र १२औँ महाधिवेशन गर्ने कार्ययोजना पेस गर्न गत साउन तेस्रो साता निर्देशन दिएको थियो । सोहि अनुसार नेविसंघको  संस्थापन र असन्तुष्ट समूहले  तीन महिनाभित्र महाधिवेशन गर्न सहमति जनाउँदै समितिमा कार्यायोजना पेश गरेका थिए । 

नेविसंघका केन्द्रीय सदस्य सुशील भट्टले छिट्टै संगठनले संघीय ढाँचाको विधान तयार पारेर पार्टीलाई बुझाएपछि महाधिवेशनको कार्यतालिका सार्वजनिक हुने अपेक्षा लिइएको बताए ।