अभिषेकलाई अमिताभको छोरो भनेर सम्बोधन गरेपछि आक्रोशित हुँदै ऐश्वर्या रायले दिइन् कडा जवाफ

काठमाडौं । अभिनेता अभिषेक बच्चनले सन् २००० मा रिलिज भएको फिल्म ‘रिफ्युजी’ बाट बलिउडमा डेब्यु गरेका थिए । यस फिल्ममा अभिषेकको हिरोइनमा करिना कपूर देखिएकी थिइन् । यो फिल्मपछि करिना कपूरको करियर सुरु भयो तर अभिषेक बच्चनलाई निकै मिहिनत गर्नुपरेको थियो ।

उनले आफ्नो करियरमा धेरै उतारचढावको सामना गरे । यति मात्र होइन, उनको अभिनयका कारण धेरै पटक उनी ट्रोलको सिकार भएका थिए । तर अहिले अभिषेक आफ्नै काम र अभिनयका कारण बलिउडमा निक्कै चर्चित छन् । तर एक कार्यक्रममा उनलाई ‘अमिताभको छोरा’ भनेर सम्बोधन गरिएपछि, उनकी श्रीमति ऐश्वर्या रायले जवाफ फर्काएकी छिन् ।

अभिषेक बच्चनलाई प्रायः मानिसहरूले ‘अमिताभ बच्चनका छोरा’ र ‘ऐश्वर्या राईको पति’ भनेर सम्बोधन गर्छन्, जसलाई ऐश्वर्या रायले जवाफ दिएकी छिन्। सन् २००७ मा ऐश्वर्या र अभिषेकले एक अन्तर्वार्ता दिएका थिए, जसमा अभिषेकलाई सोधिएको थियो कि उनलाई अमिताभको छोरा र ऐश्वर्याको श्रीमान् भनेर सम्बोधन गर्न मन लाग्दैन ? यसको जवाफमा अभिषेक बच्चनले भने, ‘बिल्कुल होइन, मलाई यसमा कुनै समस्या छैन।’

तर, ऐश्वर्या रायलाई यो प्रश्न खासै मन परेन र उनले यो प्रश्नप्रति असन्तुष्टि जनाइन् । उनले भनेका थिइन्, ‘मलाई लाग्छ यो प्रश्न सधैं उहाँमाथि थोप्नु अन्याय हो, किनभने यो त्यस्तो पटक्कै होइन। उहाँ आफ्नो काममा धेरै राम्रो हुनुहुन्छ ।’

ऐश्वर्या रायले आफ्नो पतिको पक्षमा बोलेको यो पहिलो पटक भने होइन । एक पटक ऐश्वर्याले आफ्नो अन्तर्वार्तामा अभिषेकको भलाइको बारेमा बताइन् । ऐश्वर्या रायले भनिन्, ‘अभिषेक एक साधारण, उदार र सभ्य केटा हो । मलाई उनको त्यो गुण मन पर्छ।’