भक्तपुर: रातभर परेको पानीले हनुमन्ते खोलाको सतह बढेपछि भक्तपुरको राधेराधे क्षेत्र फेरि डुबानमा परेको छ ।
भारी वर्षाका कारण ढुङ्ग्रे खोला, खस्याङ खुसुङ खोला हुँदै हनुमन्ते खोलामा बाढी आएर पानीको बहाव जमीन सतहभन्दा माथि आएपछि बस्ती डुबानमा परेको हो ।
यहाँका बस्ती डुबानमा परेपछि घरबाट मानिस बाहिर निस्किएका छैनन् । बिहान ४ बजेअगाडि देखि नै घरभित्र पानी पसेपछि यहाँका बासिन्दा त्रसित भएका थिए । पानी घरभित्र पसेपछि घरको भुइँतलाका सबै सामान बिग्रिएका छन् । पसल र केही घरका सामान भने प्रहरीले बिहानै आएर सारेको र केहीको उद्धार गरेको बताइएको छ ।
महानगरीय प्रहरी परिसर भक्तपुरका अनुसार रातभर पानी परेर खोलाको सतह बढेपछि सुरक्षाकर्मीलार्इ उच्च सतर्कताका साथ परिचालन गरिएको र डुबानग्रस्त क्षेत्रमा अहिले उद्दारका लागि काम भर्इरहेको छ ।
राधे राधे क्षेत्रका विद्यार्थी विद्यालय जान नसकेको अवस्था छ, बासिन्दा घरबाट बाहिर ननिस्कँदा कार्यालयसमेत जान पाएका छैन् । ।यहाँका होटल तथा रेष्टुरेण्ट बन्द भएका छन् । यातायात कार्यालयले राधे राधे क्षेत्रमा सञ्चालन गर्दै आएको सवारी अनुमतिपत्रको प्रयोगात्मक परीक्षा बन्द भएको छ । अरनिको राजमार्गस्थित भक्तपुर र मध्यपुरथिमि जोड्ने हनुमन्ते पुल क्षेत्र भासिएको छ ।
स्थानीयबासीलार्इ उच्च सतर्कताका साथ बस्न पनि प्रहरीले आग्रह गरेको छ ।
यो खबर पढेर तपाईलाई कस्तो महसुस भयो ?
प्रतिक्रिया