गोरखामा चुनावको ३ दिन मादक पदार्थ किनबेच र पिउन निषेध

काठमाडौं । गोरखामा स्थानीय तहको निर्वाचनको मौन अवधिमा मादक पदार्थ किनबेच गर्न र पिउन नपाइने नियम लगाइएको छ । जिल्ला प्रशासन कार्यालय गोरखाले चुनावलाई केन्द्रित गरेर मदिराजन्य पदार्थको बिक्री वितरण तथा सेवनमा पूर्ण रोक लगाएको हो ।

सिडिओ शंकरहरि आचार्यका अनुसार निर्वाचन अवधिभर जिल्लाका लागि आवश्यक पर्ने अत्यावश्यक वस्तु तथा सेवाको अभाव हुन नदिन उद्योग वाणिज्य संघ, चेम्बर अफ कमर्सलगायतका संघ संस्थाले आवश्यक व्यवस्था मिलाउने छन् ।

प्रशासनले आयोजना गरेको सर्वदलीय बैठकले मौन अवधिको समयमा जिल्लाभर मदिराजन्य पदार्थको बिक्री वितरण तथा सेवनमा पूर्ण रोक लगाउने निर्णय गरेको हो ।

जिल्लाको शान्ति सुरक्षामाथि पर्न सक्ने असरलाई दृष्टिगत गरी होटेल, रेष्टुरालगायतका व्यवसायले बैशाख २५ गतेदेखि जेठ ७ गतेसम्म साँझ साढे नौ बजेसम्म मात्र व्यवसाय सञ्चालन गर्न पाउने छन् ।