काठमाडौं । जवरजस्ती करणी मुद्दामा फरार सिन्धुली मनिठाकुर गाँउपालिका वडा नम्वर ४ का ३१ वर्षीय सिंहलाल थिड संयुक्त अरब इमिरेट्स (युएई) बाट पक्राउ परेका छन् ।
उनलाई इन्टरपोल प्रहरी युएईले पक्राउ गरेको हो । महोत्तरी वर्दीवास निवासी एक युवतीलाई जवरजस्ती करणी गरी फरार भएका थिडको पक्राउका लागि नेपाल प्रहरीले इन्टरपोल मार्फत रेड कर्नर नोटिस जारि गरेको थियो ।
अभियुक्त थिडले गत वर्ष असोजमा विदेशबाट फर्केर आउदा उपहार स्वरुप सामान लिएर आएको छु भन्दै ती युवतीलाई वर्दिवासस्थित होटल विनायकमा बोलाई जवरजस्ती करणी गरी फरार भएका थिए ।
उपहार लिन बोलाइएकी युवतीलाई रातभर होटलको कोठामा बन्दी बनाई डर त्रास देखाइ जवरजस्ती करणी गरेको जानकारी प्रहरीले दिएको हो ।
उक्त घटनापछि फरार भएका थिड विरुद्ध पीडित युवतीले जिल्ला प्रहरी कार्यालय महोत्तरीमा जवरजस्ती करणी सम्वन्धी मुद्दा दर्ता गराएकी थिइन । सोही मुद्दामा फरार थिड भागेर युएइ पुगेका थिए ।
उनको पक्राउका लागि प्रहरीले गत पुस २६ गते इन्टरपोल प्रहरी मार्फत रेड कर्नर नोटिस जारि गरेको थियो । उनलाई युएइबाट काठमाडौंमा ल्याइ आज अदालतमा पेश गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया