एनआरएनएको भेलाद्वारा ४ बुँदे प्रस्ताव पारित

काठमाडौं । गैरआवासीय नेपाली संघ (एनआरएनए) राष्ट्रिय समन्वय परिषद् (एनसीसी)को अध्यक्षहरुको बैठक भर्चुएल माध्यमबाट बसेको छ ।

संघमा अहिले देखिएको गम्भीर संकटबारे परामर्श गरी आगामी कार्यदिशाबारे छलफल गर्न संघका पूर्वअध्यक्षहरु शेष घले तथा देवमान हिराचनले उक्त बैठक बोलाएका थिए ।

आइतबार बसेको बैठकमा ४५ भन्दा बढी मुलुकका एनसीसी अध्यक्ष तथा पदाधिकारीहरुको सहभागिता थियो।

एनसीसी अध्यक्षहरुलाई सम्बोधन गर्दै पूर्वअध्यक्ष डा. शेष घलेले एनसीसीहरुलगायत सबैलाई ‘एकताबद्ध तथा बलियो एनआरएनए बनाउने’ एउटा मात्रै मुख्य ध्येय लिएर अगाडि बढ्न आग्रह गरेका थिए ।

उनले एनसीसीहरुलाई संस्थाभित्र भत्किएको एकता र सम्बन्धलाई फेरि पुनर्जीवन दिन आग्रह गरेका थिए ।

‘यो कुनै व्यक्तिगत स्वार्थको लागि बनाएको संस्था होइन, संसारभरिका नेपालीहरुको हितको लागि बनाएको संस्था हो । हामीले संस्था फुटाउन लागेको भन्ने कुरामा विश्वास नगर्नोस् । कुनै पनि हालतमा यो संस्थालाई बचाउनु पर्छ । यो जग तपाईंहरुले बलियो बनाउनु पर्छ, त्यसपछि मात्रै आइसीसी बलियो हुन्छ,’ पूर्वअध्यक्ष देवमान हिराचनले भने ।

बैठकलाई आइसीसीका सल्लाहकारहरु कुल आचार्य, विश्व आदर्श पण्डित, त्रिलोक गुरुङ केन्द्रीय उपाध्यक्षहरु सोनाम लामा, मन केसी, सचिव आरके शर्मा, महिला संयोजक भोमा लिम्बु, अन्य पदाधिकारीहरु, युरोप संयोजक नारायण आचार्य, मध्यपूर्व संयोजक प्रबिन गुरुङ, सहसंयोजक मनोज गोर्खाली, एसिया प्यासिफिक संयोजक रोविन्द प्रसाद श्रेष्ठलगायत ४५ देशका अध्यक्ष र पदाधिकारीले सम्बोधन गरेका थिए ।

कार्यक्रममा सहभागी एनसीसी अध्यक्षहरुले संघको अन्तर्राष्ट्रिय समन्वय परिषद (आइसीसी) का पछिल्ला निर्णयहरुप्रति गम्भीर चिन्ता व्यक्त गर्दै विधान विपरितका निर्णयहरु गर्ने, एकपक्षीय निर्वाचन कार्यक्रम अगाडि बढाउने, एनसीसीहरुलाई दबाव दिनेजस्ता कामको कडा विरोध गरेका थिए ।

बैठकपछि अध्यक्षहरुले चारबुँदे विज्ञप्ति जारी गरेका थिए । पहिलो बुँदामा संरक्षक परिषद् तथा उच्चस्तरीय समितिलाई पूर्ववत् रुपमा काम गर्न आह्वान गरिएको छ ।

दोस्रो बुँदामा संघका सदस्यहरुलाई विभिन्न प्रकारका दबाब र धम्की दिने कामहरु तत्काल बन्द गर्न आग्रह गरिएको छ । तेस्रो बुँदामा प्रतिनिधि विवाद समाधान गरेर मात्र निर्वाचन कार्यक्रम अगाडि बढाउन आह्वान गरिएको छ ।

चौथो बुँदामा स्वतन्त्र, निस्पक्ष र धांधलीरहित संघको निर्वाचन सुनिश्चित गर्न आइसीसी र निर्वाचन समितिलाई आग्रह गरेको छ ।