गगन थापा भन्छन्- ‘हाम्रो बिचमा कुराकानी मिलेन भने गठबन्धन चल्दैन’

काठमाडौं । नेपाली कांग्रेसका महामन्त्री तथा सांसद गगनकुमार थापाले सत्तारुढ राजनीतिक दलहरुका बिचमा कुराकानी नमिलेमा गठबन्धन नचल्ने बताए ।
शुक्रबार बसेको प्रतिनिधि सभाको बैठकपछि बोल्दै सांसद थापाले कुराकानी पनि नमिल्ने र गठबन्धन पनि भइराख्ने कुरा नहुने स्पष्ट पारे ।

नेपालको अन्तर्राष्ट्रिय विश्वसनीयताका लागि एमसीसीलाई संसदमा टेबुल गरी आ–आफ्नो मत प्रकट गर्नुपर्ने उनले बताए । उनले भने– ‘गठबन्धन हाम्रो बिचमा कुराकानी मिलेर बन्यो । हाम्रो बिचमा कुराकानी मिलिरहे गठबन्धन चलिराख्छ । हाम्रो बिचमा कुराकानी मिलेन भने गठबन्धन चल्दैन । कुराकानी मिलेन भने चल्दैन । कुराकानी पनि नमिल्ने गठबन्धन पनि चलिराख्छ भन्ने कुरा हुँदैन । हामी फरक– फरक राजनीतिक दलहरु हौँ । हामी फरक–फरक दलहरु भएको कारणले गर्दाखेरी हाम्रो बिचमा गठबन्धन हुनका लागि त केही कुराहरुमा कुराकानी मिल्नुपर्छ । न्यूनतम कुराहरुमा कुरा मिल्नुपर्छ । आजको दिनमा नेपाली कांग्रेस माधव नेपालको पालादेखि सुरु भएर आएको दसौँ वर्ष लागेर यहाँसम्म आइसकेपछाडी यो नेपालको अन्तर्राष्ट्रिय विश्वसनीयताको कुरा हो । हामी सबैले यसमा काम गरिसक्यौँ । हामी सबैजना कहीँ न कहीँ यसमा संलग्न छौँ । अहिले सिंगो नेपालको विश्वसनीयतामाथि ह्रास आउँछ भन्नेकुरा गरिरहदै गर्दा एक ठाउँमा उभिन सक्दैनौँ यसमा भनेदेखि भने हामीले प्रष्ट भनेका छौँ टेबल गरौँ हामीहरु आ–आफ्नो ठाउँमा मतदान गर्न सक्छौँ ।’