सल्यान – नेपाली काँग्रेसका प्रवक्ता विश्वप्रकाश शर्माले काँग्रेसका लागि सुध्रिने सुनौलो अवसर आएको बताएका छन् ।
नेपाल शिक्षक संघको २९ औँ प्रतिनिधिसभालाई आज सम्बोधन गर्दै शर्माले प्रतिपक्षमा बसेर बिग्रेको काँग्रेस सुधार्ने अहिले नै सबैभन्दा राम्रो अवसर रहेको बताए ।
मदन भण्डारीको जनताको बहुदलीय जनवाद आत्मसात गरेको नेकपा एमालेले भण्डारीको निधन भएको २५ वर्षपछि उनको विचारलाई समेत मारेको आरोप लगाए ।
एकपटक चुनाव हार्दैमा नआत्तिन काँग्रेस कार्यकर्ताहरूलाई आग्रह गर्दै शर्माले भने, “पात झर्दैमा रुख सुक्दैन, नआत्तिनुस, लोकप्रियताका लागि कम्युनिष्टहरूले नारा मात्रै बेचेका हुन्, उनीहरूको नारा लगाउनु र काम गर्नुको अन्तर अब थाहा पाउँछौँ ।” शर्माले भने ।
अहिले कम्युनिष्टको आँधीहूरी आएको भन्दै शर्माले केही हाँगा भाँच्चिदैमा काँग्रेस नमर्ने बताए । कांग्रेस कार्यकर्तालाई रुखको जरा बनेर अडिग रहन उनले आग्रह गरे ।
प्रधानमन्त्री जस्तो व्यक्तिले हरेक कुरालाई हल्का टिप्पणी गर्ने गरेको भन्दै शर्माले प्रधानमन्त्रीलाई जिम्मेवार भएर बोल्न आग्रह गरे ।
कार्यक्रममा नेपाली काँग्रेसका केन्द्रीय सदस्य बद्री पाण्डे, शिक्षक संघका केन्द्रीय अध्यक्ष राजेन्द्रराज पौडेल लगायतले मन्तव्य व्यक्त गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया