सफ्टवेयर प्रणालीबाट राजस्व संकलन सुरु

रुकुम (पूर्व) । रुकुम (पूर्व)का तीनवटै स्थानीय तहले सफ्टवेयर प्रणालीमार्फत राजस्व संकलन सुरु गरेका छन् ।

भूमे, पुथाउत्तरगंगा र सिस्ने गाउँपालिकाले सफ्टवेयर प्रणाीमार्फत राजस्व संकलनको कार्य थालेका हुन् । भूमे गाउँपालिकाका प्रमुख प्रशासकीय अधिकृत चन्द्रसिंह श्रेष्ठले इन्टरनेटको समस्यालाई समाधान गरी सबै वडामा यो प्रणाली लागू गर्ने अभियानमा गाउँपालिका लागि परेको बताए । सो गाउँपालिकाले चालु आर्थिक वर्षमा ६१ लाख ७८ हजार रुपैयाँ राजस्व संकलन गर्ने लक्ष्य राखेको छ । यसमा गत मंसिर १५ सम्म १७ लाख ४४ हजार राजस्व संकलन भइसकेको जनाइएको छ ।

त्यस्तै पुथाउत्तरगंगाले राजस्व संकलन प्रणालीलाई चुस्त, दुरुस्त र अध्यावधिक बनाउने उद्देश्यका साथ सफ्टवेयर प्रणाली अंगालिएको गाउँपालिकाका लेखा शाखा प्रमुख नवराज खड्काले बताए । गाउँपालिकाले चालु आर्थिक वर्ष २०७८/७९ मा ५० लाख रुपैयाँ राजस्व संकलन गर्ने लक्ष्य लिएको छ । सबै वडामा नियमितरुपमा इन्टरनेटको सुविधा नहुँदा भने यो प्रणाली कार्यान्वयनमा चुनौती देखिएको गाउँपालिकाले जनाएको छ ।

सिस्ने गाउँपालिकाले पनि यही पुस १ गतेबाट सफ्टवेयर प्रणालीमार्फत राजस्व संकलन सुरु गरेको निमित्त प्रमुख प्रशासकीय अधिकृत चिन्तामणि दाहालले जानकारी दिए । राजस्व प्रणालीमा एकरुपता ल्याई राजस्व संकलन कार्यलाई थप व्यवस्थित र पारदर्शी बनाउन सफ्टवेयरमार्फत राजस्व संकलन सुरु गरिएको उनले बताए ।

गाउँपालिकाले चालु आव २०७८/७९ मा एक करोड १० लाख रुपैयाँ राजस्व संकलन गर्ने लक्ष्य लिएको छ । सफ्टवेयरबाट राजस्व संकलन गर्न जिल्लाका ३१ वटै वडाका वडा सचिव, एमआइएस फिल्ड सहायक र कम्प्युटर अपरेटरलाई तालिम दिइएको छ । तीनवटै पालिकामा गाउँपालिकाको आयोजना र सफ्टेक इन्फोसिस प्रालि काठमाडौंको प्राविधिक सहयोगमा वडा सचिव र अन्य कर्मचारीलाई तालिम प्रदान गरिएको हो ।

यसअघि हस्तलिखित रसिदको प्रयोग गरी राजस्व संकलन गर्दै आएकोमा विद्युतीय प्रणालीले राजस्व संकलनमा सहजता आउन विश्वास गरिएको छ । अब गाउँ तथा वडा पालिकाले संकलन गर्दै आएका विभिन्न सेवा शुल्क, व्यवसाय दर्ता शुल्क र मालपोत करलगायत अन्य सवै राजस्व विद्युतीय माध्यमबाट संकलन हुने छन् ।

कहिलेकाहीँ विद्युत् र इन्टरनेट नहुँदा केही समस्या भए पनि यो प्रणालीले सेवा दिने र लिने दुवैलाई सहज हुनेछ । यसअघि हस्तलिखित रसिदको माध्यमबाट राजस्व संकलन गर्दा बेरुजु आउने गरेकोमा त्यो समस्या अब समाधान हुने अपेक्षा गरिएको छ ।